മുതുമല: മുതുമല കടുവാ സംരക്ഷണ കേന്ദ്രത്തിലെ ആനവളര്‍ത്തു കേന്ദ്രത്തിലേക്ക് പുതിയ അതിഥിയെത്തി. പത്ത് ദിവസം പ്രായമുള്ള കുട്ടിക്കൊമ്പനാണ് പുതിയ വിരുന്നുകാരന്‍. മേട്ടുപ്പാളയം ശിരുമുഖം വനത്തില്‍ നിന്നാണ് ഈ കുട്ടിയാനയുടെ വരവ്.
തള്ളയെ പിരിഞ്ഞ് കൂട്ടംതെറ്റിയ നിലയില്‍ വനത്തിനുള്ളില്‍ കണ്ടെത്തിയ ആനക്കുട്ടിയെ വനംവകുപ്പ് ആനവളര്‍ത്തു കേന്ദ്രത്തില്‍ എത്തിക്കുകയായിരുന്നു. ജീപ്പില്‍ പ്രത്യേക സജ്ജീകരണങ്ങളൊരുക്കിയാണ് കുട്ടിക്കൊമ്പനെ എത്തിച്ചത്. ഇതോടെ കേന്ദ്രത്തിലെ അംഗങ്ങളുടെ എണ്ണം 25 ആയി.
ചേരമ്പാടി പ്രദേശത്ത് നിരവധി മനുഷ്യജീവനുകളെടുത്ത ആന കൊലക്കൊല്ലി കേന്ദ്രത്തില്‍ അനുസരണ പടിച്ച് വരുന്നുണ്ട്. പത്ത് ജീവനുകളെടുത്ത മൂര്‍ത്തിയെന്ന ആനയും അനുസരണ പഠിക്കുകയാണ്.
കൃഷ്ണഭാരതി എന്ന ആറുവയസ്സുകാരിയായിരുന്നു കേന്ദ്രത്തിലെ പ്രായം കുറഞ്ഞ ആനക്കുട്ടി. കുട്ടിയാനക്കായി കേന്ദ്രത്തില്‍ എല്ലാ സജ്ജീകരണങ്ങളും ഒരുക്കിയിട്ടുണ്ടെന്ന് വനംവകുപ്പ് ഉദ്യോഗസ്ഥര്‍ പറഞ്ഞു.
ദിവസങ്ങളായി പാല്‍ കുടിക്കാത്ത ആനക്കുട്ടിക്ക് ലാക്‌ടോജനും പാലും നല്‍കി വരുന്നുണ്ട്. പ്രത്യേക മുറിയില്‍ ഹീറ്ററടക്കമുള്ള സംവിധാനങ്ങള്‍ കുട്ടിയാനക്കായി ഒരുക്കിയിട്ടുണ്ട്. പാപ്പാന്‍ ബൊമ്മന്റെ നേതൃത്വത്തിലുള്ള മൂന്നുപേരാണ് കുട്ടിക്കൊമ്പന്റെ പരിചരണങ്ങള്‍ ഏറ്റെടുത്തിരിക്കുന്നത്.