പാലാ: പ്രായത്തെ തോല്‍പിച്ച് ഇന്ത്യന്‍ കരാട്ടെയില്‍ ചരിത്രം കുറിച്ച ജി കൃഷ്ണന്‍ ഓര്‍മയായി. പാലാ വെളളപ്പാട് കൊണ്ടാട്ട് കൃഷ്ണന്‍ (86) വാര്‍ദ്ധക്യരോഗത്തെ തുടര്‍ന്നാണ് അന്തരിച്ചത്. 54-മത്തെ വയസ്സില്‍ കരാട്ടെയുടെ ലോകത്ത് എത്തിയ കൃഷ്ണന്‍ 60-മത്തെ വയസില്‍ ബ്ലാക്ക് ബെല്‍റ്റ് നേടി ചരിത്രം കുറിച്ചു. ഈ പ്രായത്തില്‍ ബ്ലാക്ക് ബെല്‍റ്റ് നേടുന്ന ആദ്യ ഇന്ത്യക്കാരനായി അദ്ദേഹം. സുഹൃത്തുക്കളുടെയും ശിഷ്യഗണങ്ങളുടെയും നിറകണ്ണുകളെ സാക്ഷിയാക്കിയാണ് ഓര്‍മ്മകള്‍ ബാക്കിയാക്കി കൃഷ്ണന്‍ യാത്രയായത്.
യൗവ്വനകാലത്ത് തയ്യലും ഡ്രൈവിംഗുമായിരുന്നു കൃഷ്ണന്റെ ഉപജീവനമാര്‍ഗ്ഗം. മദ്ധ്യവയസ്സിലെത്തിയതോടെ ആസ്മരോഗത്തിന് അടിപ്പെട്ടു. തുടര്‍ന്ന് ചികിത്സയും മരുന്നുമായി മാറിയതോടെ പതിവ് ജോലികളില്‍ നിന്ന് പിന്മാറി. തുടര്‍ന്ന് കൃഷിയിലേക്ക് ചേക്കേറി. വിളവെടുപ്പില്‍ നൂറുമേനി കൊയ്‌തെങ്കിലും രേഗം അദ്ദേഹത്തെ വലച്ചിരുന്നു. രോഗത്തെ വകവയ്ക്കാതെ വിയര്‍ത്ത് പണിയെടുത്തെങ്കിലും രാത്രിയായാല്‍ ശ്വാസതടസ്സം വല്ലാതെ വിഷമിപ്പിച്ചിരുന്നു. ഈ സമയത്താണ് 1990 ല്‍ വീടിനടുത്തുളള എന്‍എസ്.എസ് കരയോഗമന്ദിരത്തില്‍ കൊടുംപിടി പനന്താനത്ത് പി.സി തോമസ് എന്ന കരാട്ടെ മാസ്റ്റര്‍ പരിശീലനക്ലാസ്സുകള്‍ ആരംഭിച്ചത്.
കൊച്ചുകുട്ടികളെ പരിശീലിപ്പിക്കുന്ന സ്ഥാപനത്തില്‍ കൃഷ്ണന്‍ പതിവ് സന്ദര്‍ശകനായി. ഇതിനിടെ തോമസ് മാഷുമായി ചങ്ങാത്തത്തിലുമായി. തന്നെ അലട്ടുന്ന രോഗത്തെക്കുറിച്ച് മാസ്റ്ററുമായി പങ്കുവച്ചതോടെ ചില പ്രത്യേക പരിശീലന മുറകളും വ്യായാമവും അദ്ദേഹം നിര്‍ദ്ദേശിച്ചു.
ആദ്യം കഠിനമായി തോന്നിയ വ്യായാമം പിന്നീട് ആസ്മയെ അകറ്റുന്നതായി കൃഷ്ണന്‍ തിരിച്ചറിഞ്ഞു. ഇതോടെയാണ് കരാട്ടെയുടെ കൂടുതല്‍ സാധ്യതകളെക്കുറിച്ചും പരിശീലനത്തെക്കുറിച്ചും ചിന്തിച്ചു തുടങ്ങിയത്.
നാലുവര്‍ഷം കൊണ്ട് തന്നെ ബ്ലാക്ക് ബെല്‍റ്റ് പരിശീലനം പൂര്‍ത്തിയാക്കി. പത്ത് സെക്കറ്റില്‍ നൂറ് പഞ്ചായിരുന്നു അമ്മാവന്റെ ശേഷി. ഇത് ഒരു സെക്കന്റില്‍ നൂറ് പഞ്ചാക്കനായിരുന്നുഅദ്ദേഹത്തിന്റെ ശ്രമം. ബ്ലാക്ക് ബെല്‍റ്റ് ടെസ്റ്റിനുളള അധികൃതര്‍ എത്താതിരുന്നതിനെ തുടര്‍ന്ന് രണ്ട് വര്‍ഷത്തോളം കാത്തിരിക്കേണ്ടിവന്നു. തുടര്‍ന്ന് 1990ല്‍ ഇന്ത്യന്‍ ചരിത്രത്തില്‍ പുതിയ അധ്യായം കുറിച്ച് 60-ാം വയസ്സില്‍ കൃഷ്ണന്‍ കരാട്ടെ ബ്ലാക്ക് ബെല്‍റ്റിന്റെ ഫസ്റ്റ് ഡാന്‍ കരസ്ഥമാക്കി. തൊടുപുഴയിലാണ് ഇന്റര്‍ നാഷണല്‍ ഷോറുന്റിയോ ടെസ്റ്റ് നടന്നത്. ഇതോടെ നാട്ടിലെങ്ങും കൃഷ്ണന് ജാക്കിച്ചാന്‍ എന്നും കരാട്ടെ അമ്മാവന്‍ എന്നും ഓമനപ്പേര് വന്നു. തുടര്‍ന്ന് ബ്ലാക്ക് ബെല്‍റ്റിന്റെ സെക്കഡ് ഡാനും പൂര്‍ത്തിയാക്കി.
കഴിഞ്ഞ ഒരു വര്‍ഷത്തോളമായി ശാരീരിക ബുദ്ധിമുട്ടുകളെ തുടര്‍ന്ന് വിശ്രമത്തിലായിരുന്നു കൃഷ്ണമ്മാവന്‍. രോഗം മൂര്‍ച്ഛിച്ചതിനെ തുടര്‍ന്ന് കഴിഞ്ഞ ദിവസം മരണത്തിന് കീഴടങ്ങി. നൂറുകണക്കിന് ആളുകളുടെ സാനിദ്ധ്യത്തില്‍ മൃതദ്ദേഹം സംസ്‌കരിച്ചു. നാദസ്വരത്തില്‍ പ്രശസ്തരായ അമ്പലപ്പുഴ സഹോദരന്‍മാരിലെ ഗോപാലകൃഷ്ണപ്പണിക്കറുടെ മകളും കിടങ്ങൂര്‍ എന്‍എസ്എസ് സ്‌കൂളിലെ സംഗീത അധ്യാപികയുമായിരുന്ന റ്റി.ജി മാലതി ഭായ് ആണ് ഭാര്യ. മക്കള്‍: രഞ്ജിനി, രമ, രതി. മരുമക്കള്‍: രാജശേഖരന്‍, വേണുഗോപാല്‍, പ്രസാദ്.