കണ്ണൂര്‍: ശ്രീനാരായണ ഗുരുവിന്റെ നമുക്ക് ജാതിയില്ലാ വിളംബരത്തിന്റെ ശതാബ്ദി ആഘോഷത്തിന്റെ ജില്ലാതല ഉദ്ഘാടനം ഇന്നു ഉച്ചയ്ക്കു 2.30ന് മുന്‍സിപ്പല്‍ സ്‌കൂള്‍ ഓഡിറ്റോറിയത്തില്‍ മുഖ്യമന്ത്രി പിണറായി വിജയന്‍ നിര്‍വഹിക്കും. മന്ത്രി കെ.കെ ശൈലജ അധ്യക്ഷയാകും. നവോഥാന പ്രദര്‍ശനത്തിന്റെ ഉദ്ഘാടനം മന്ത്രി കടന്നപ്പള്ളി രാമചന്ദ്രന്‍ നിര്‍വഹിക്കും. മേയര്‍ ഇ.പി ലത സപ്ലിമെന്റ് പ്രകാശനവും കലക്ടര്‍ മിര്‍ മുഹമ്മദലി ജാതിയില്ലാ വിളംബരത്തിന്റെ കലണ്ടര്‍ വിതരണ ഉദ്ഘാടനവും നിര്‍വഹിക്കും. എം.പിമാരായ പി.കെ ശ്രീമതി, പി കരുണാകരന്‍, മുല്ലപ്പള്ളി രാമചന്ദ്രന്‍, റിച്ചാര്‍ഡ് ഹേ, കെ.കെ രാഗേഷ് എന്നിവര്‍ മുഖ്യാതിഥികളാകും. വൈകുന്നേരം നാലിന് ജാതിയില്ലാ പ്രഖ്യാപനത്തിന്റെ സമകാലിക പ്രസക്തി എന്ന വിഷയത്തില്‍ നടക്കുന്ന സെമിനാറില്‍ ഡോ. സുനില്‍ പി ഇളയിടം വിഷയാവതരണം നടത്തും.