പേരൂര്‍ക്കട: നഗരത്തിലെ കഞ്ചാവ് കച്ചവടക്കാര്‍ക്ക് മൊത്തമായി കഞ്ചാവ് എത്തിക്കുന്ന സംഘത്തിലെ പ്രധാനി പിടിയിലായി. തമിഴ്‌നാട് തേനി ഗൂഡല്ലൂര്‍ സ്വദേശി വനരാജ് (53) ആണ് കൊച്ചുവേളി പുതിയ റെയില്‍വേ സ്റ്റേഷന് സമീപത്തുവച്ച് ഷാഡോ ടീമിന്റെ പിടിയിലായത്.
നഗരത്തിലെ കോളജുകളും സ്‌കൂളുകളും കേന്ദ്രീകരിച്ച് കഞ്ചാവ് കച്ചവടം നടത്തുന്നവരെ കുറിച്ച് നടത്തിയ അന്വേഷണത്തിനൊടുവിലാണ്
തമിഴ്‌നാട്ടില്‍നിന്നു കഞ്ചാവെത്തിക്കുന്നവരെക്കുറിച്ച് വിവരം ലഭിച്ചത്.
പ്രതി കമ്പം, തേനി, ഉസലംപെട്ടി തുടങ്ങിയ സ്ഥലങ്ങളിലെ വിവിധ കഞ്ചാവ് കച്ചവടക്കാരുടെ ഏജന്റായും പ്രവര്‍ത്തിച്ചിരുന്നു. ആന്ധ്രയില്‍ നിന്നും വളരെ തുച്ഛമായ വിലയ്ക്ക് കഞ്ചാവ് വാങ്ങുന്ന ഇയാള്‍ കിലോയ്ക്ക് 15,000 രൂപയ്ക്കാണ് വിറ്റിരുന്നത്.
കണ്‍ട്രോള്‍ റൂം അസി. കമ്മിഷണര്‍ വി. സുരേഷ്‌കുമാര്‍, ശംഖുംമുഖം എ.സി. പി. മഹേഷ്‌കുമാര്‍, പേട്ട സി.ഐ. എസ്.വൈ. സുരേഷ്, എസ്.ഐ. ചന്ദ്രബോസ്, ഷാഡോ എസ്.ഐ. സുനില്‍ലാല്‍, ടീം അംഗങ്ങള്‍ എന്നിവര്‍ ഉള്‍പ്പെട്ട സംഘമാണ് അറസ്റ്റിനു നേതൃത്വം നല്‍കിയത്. പ്രതിയെ കോടതിയില്‍ ഹാജരാക്കി.