കണ്ണൂര്‍: സി.പി.എം പടുവിലായി ലോക്കല്‍ കമ്മിറ്റി അംഗം വാളാങ്കിച്ചാലിലെ കെ മോഹനനെ വെട്ടിക്കൊലപ്പെടുത്തിയ കേസില്‍ കണ്ണൂര്‍ സെന്‍ട്രല്‍ ജയിലില്‍ റിമാന്‍ഡില്‍ കഴിയുന്ന ആര്‍.എസ്.എസ് പ്രവര്‍ത്തകനു മര്‍ദനമേറ്റതായി പരാതി. പാതിരിയാട് എം.ഒ.പി റോഡിലെ നവജിത്തി(23)നാണ് മര്‍ദനമേറ്റത്. റിമാന്‍ഡിലായി ജയിലിലെ സ്‌പെഷല്‍ സെല്ലില്‍ കഴിയുകയായിരുന്നു നവജിത്ത്. രാവിലെ ചായ കുടിക്കാനായി പുറത്തുവന്നപ്പോള്‍ ഏതാനും പ്രതികള്‍ കേസിനെ കുറിച്ച് അന്വേഷിച്ചിരുന്നു.
ഉപ്പുമാവില്‍ മണ്ണു വാരിയിടുകയും പിന്നീട് ആശുപത്രി ബ്ലോക്കില്‍ കൊണ്ടുപോകുന്നതിനിടെ മര്‍ദിക്കുകയുമായിരുന്നുവെന്ന് ജയില്‍ സൂപ്രണ്ടിനു നല്‍കിയ പരാതിയില്‍ പറയുന്നു. ഇന്നലെ രാവിലെ പ്രതിയെ കാണാനെത്തിയ ബി.ജെ.പി പ്രവര്‍ത്തകരാണ് വിവരമറിഞ്ഞ് പരാതി നല്‍കിയത്.