സ്‌റ്റോക്‌ഹോം: സാഹിത്യത്തിനുള്ള നൊബേല്‍ പുരസ്‌കാരം ലഭിച്ച ബോബ് ഡിലനെ വിവരം അറിയിക്കാന്‍ കഴിയാതെ നൊബേല്‍ സമിതി കുഴങ്ങി. നിരവധി തവണ ഡിലനെ ഫോണില്‍ വിളിച്ചെങ്കിലും അദ്ദേഹം ഫോണെടുത്തില്ല. ഒടുവില്‍ അദ്ദേഹത്തിന്റെ സുഹൃത്തിന് ഇമെയില്‍ ചെയ്തു നൊബേല്‍ സമിതി തടിതപ്പി. ഡിലനെ വിളിക്കാനുള്ള ശ്രമം അവസാനിപ്പിച്ചുവെന്നും സ്വീഡിഷ് അക്കാദമി സ്ഥിരം സെക്രട്ടറി സാറാ ഡാനിയസ് പറഞ്ഞു. ഇപ്പോള്‍ ഞങ്ങള്‍ ഒന്നും ചെയ്യുന്നില്ല. താന്‍ അദ്ദേഹത്തിന്റെ അടുത്ത അനുയായിയെ ഫോണില്‍ ബന്ധപ്പെട്ടു. ഇ-മെയിലും അയച്ചു. അത് തന്നെ ധാരാളം- ഡാനിയസ് പറഞ്ഞു.
പുരസ്‌കാരം പ്രഖ്യാപിച്ച ദിവസം ലാസ്‌വേഗാസില്‍ ഡിലന്‍ സംഗീതപരിപാടി നടത്തിയിരുന്നു. എന്നാല്‍ ലോകത്തെ ഏറ്റവും വലിയ സാഹിത്യ പുരസ്‌കാരത്തെ കുറിച്ച് ഡിലന്‍ ഒന്നും പ്രതികരിച്ചില്ല.  
ഡിസംബര്‍ പത്തിനാണ് നൊബേല്‍ പുരസ്‌കാര ദാന ചടങ്ങ്. ഔദ്യോഗിക വിരുന്നില്‍ നൊബേല്‍ പുരസ്‌കാര ജേതാക്കളുടെ പ്രസംഗവും ഉണ്ടാകാറുണ്ട്. ചടങ്ങിലേക്ക് ക്ഷണിക്കാന്‍ കൂടിയാണ് നൊബേല്‍ കമ്മിറ്റി ബോബ് ഡിലനെ ബന്ധപ്പെട്ടത്. എന്നാല്‍ ഡിലന്‍ പുരസ്‌കാരം വാങ്ങാന്‍ എത്തുമോയെന്ന കാര്യത്തിലും സമിതിക്ക് ഉറപ്പില്ല. ചടങ്ങിനു വരാന്‍ ഡിലന്‍ തയാറാകുമെന്നാണ് പ്രതീക്ഷയെന്ന് സമിതി പറഞ്ഞു.