മഞ്ചേരി: ചെറുകുളം അങ്ങാടി ജങ്ഷനില്‍ സ്ഥിതിചെയ്യുന്ന ട്രാന്‍സ്‌ഫോമര്‍ അപകട ഭീഷണി ഉയര്‍ത്തുന്നതിനാല്‍ മാറ്റി സ്ഥാപിക്കണമെന്ന ആവശ്യം ശക്തമാവുന്നു. സുരക്ഷാ മതിലോ, ഉയര്‍ന്ന തറയോ ഉണ്ടാക്കാതെ നിര്‍മിച്ചതുകൊണ്ട് വാഹനങ്ങള്‍ക്കു വശംകൊടുക്കാനും കാല്‍നടയാത്രക്കാര്‍ക്കു സുരക്ഷിതമായി യാത്രചെയ്യാനും കഴിയുന്നില്ലെന്ന ആക്ഷേപം ഉയര്‍ന്നിരിക്കുകയാണ്.
ചെറുകുളം അങ്ങാടിയിലെ നിസ്‌കാരപള്ളിയോടു ചേര്‍ന്നാണ് നിലവില്‍ ട്രാന്‍സ്‌ഫോര്‍മര്‍ സ്ഥിതിചെയ്യുന്നത്. കൂടാതെ ചെറുകുളം മദ്‌റസ, എല്‍.പി സ്‌കൂള്‍, എളങ്കൂര്‍ ഹയര്‍സെക്കന്‍ഡറി സ്‌കൂള്‍, ഇ.കെ.സി കോളജ് തുടങ്ങി സ്ഥാപനങ്ങളും ഇതിനു സമീപങ്ങളില്‍ തന്നെ പ്രവര്‍ത്തിക്കുന്നതിനാല്‍ എല്ലാ സമയത്തും സ്‌കൂള്‍ വിദ്യാര്‍ഥികളും വാഹനങ്ങളും നിറഞ്ഞ തിരക്കേറിയ ജങ്ഷനാണിത്. നൂറുകണക്കിനു വാഹനങ്ങളാണ് ഇതുവഴി പോകുന്നത്.
ഏതു സമയത്തും വലിയ അപകടങ്ങള്‍ ഉണ്ടാകാന്‍ തക്ക വിധത്തില്‍ വര്‍ഷങ്ങള്‍ക്കു മുന്‍പ് സ്ഥാപിക്കപ്പെട്ട ഈ ട്രാന്‍സ്‌ഫോമര്‍ സുരക്ഷിതമായ സ്ഥലത്തേക്കു മാറ്റി സ്ഥാപിക്കാന്‍ നാളിതുവരെ നടപടികള്‍ ഉണ്ടായിട്ടില്ല. വലിയ വാഹനങ്ങള്‍ ഇതുവഴി കടന്നുപോവാന്‍ പലപ്പോഴും നന്നേ പ്രയാസപ്പെടാറുണ്ട്. സ്ഥാപിച്ച സമയത്ത് താല്‍ക്കാലികമാണെന്നും പിന്നീട് സുരക്ഷിതമാക്കി മാറ്റി പണിയുമെന്നും അറിയിച്ചിരുന്നുവെങ്കിലും പിന്നീടതെല്ലാം വെറുവാക്കാവുകയായിരുന്നുവെന്നു നാട്ടുകാര്‍ പറഞ്ഞു.