കൊല്ലം: ജില്ലയില്‍ കണ്ടല്‍വനവല്‍കരണത്തിനായി വിപുലമായ പദ്ധതി തയാറാക്കാന്‍ ജില്ലാ കലക്ടറുടെ അധ്യക്ഷതയില്‍ കലക്ട്രേറ്റില്‍  ചേര്‍ന്ന ജനപ്രതിനിധികളുടെയും ഉദ്യോഗസ്ഥരുടെയും യോഗം തീരുമാനിച്ചു. തദ്ദേശഭരണ സ്ഥാപനങ്ങള്‍, സാമൂഹിക വനവല്‍കരണ വിഭാഗം, ദേശീയ ഗ്രാമീണ തൊഴിലുറപ്പ് പദ്ധതി എന്നിവയുമായി  സഹകരിച്ച് പദ്ധതി നടപ്പാക്കുന്നതിനുള്ള സാധ്യതകളും പരിശോധിക്കും.
പ്രാരംഭ നടപടിയെന്നോണം  കണ്ടല്‍ കാടുകള്‍ വച്ചുപിടിപ്പിക്കുന്നതിനുള്ള മേഖലകള്‍ നിര്‍ണയിക്കുന്നതിനായി സാമൂഹിക വനവല്‍കരണ വിഭാഗത്തിന്റെ നേതൃത്വത്തില്‍ വിപുലമായ സര്‍വേ നടത്തും. രണ്ടാഴ്ച്ചയ്ക്കുള്ളില്‍ സര്‍വേ റിപ്പോര്‍ട്ട് സമര്‍പ്പിക്കണമെന്ന് സാമൂഹിക വനവല്‍കരണ വിഭാഗത്തിന് കലക്ടര്‍ നിര്‍ദേശം നല്‍കി. റിപ്പോര്‍ട്ട് ലഭിച്ചശേഷം വിശദമായ ചര്‍ച്ചയുടെ അടിസ്ഥാനത്തില്‍ പദ്ധതിക്ക് രൂപം നല്‍കുമെന്നും സമയബന്ധിതമായി നടപ്പാക്കുമെന്നും കലക്ടര്‍ പറഞ്ഞു.
നിലവില്‍ ജില്ലയില്‍ മണ്‍ട്രോതുരുത്ത്, ചവറ തെക്കുംഭാഗം എന്നീ ഗ്രാമ പഞ്ചായത്തുകളില്‍ ദേശീയ ഗ്രാമീണ തൊഴിലുറപ്പ് പദ്ധതിയുടെ സഹകരണത്തോടെ കണ്ടല്‍വനവല്‍കരണം നടപ്പാക്കുന്നുണ്ട്.