തൊട്ടില്‍പ്പാലം: കാവിലുംപാറ ഗ്രാമപഞ്ചായത്ത് കുടുംബശ്രീ പ്രവര്‍ത്തകര്‍ പഞ്ചായത്തിലെ 10-ാം വാര്‍ഡില്‍ ആനക്കുളത്ത് പാറയുള്ള പറമ്പത്ത് രാധയ്ക്കു നിര്‍മിച്ചു നല്‍കുന്ന സ്‌നേഹവീടിന്റെ താക്കോല്‍ദാനം നാളെ രാവിലെ 11നു നടക്കുമെന്ന് ഭരണസമിതി അംഗങ്ങള്‍ പത്രസമ്മേളനത്തില്‍ അറിയിച്ചു. നാദാപുരം എം.എല്‍.എ ഇ.കെ വിജയന്റെ അധ്യക്ഷതയില്‍ തൊഴില്‍-എക്‌സൈസ് വകുപ്പ് മന്ത്രി ടി.പി രാമകൃഷ്ണന്‍ താക്കോല്‍ദാനം നിര്‍വഹിക്കും.
കുടുംബശ്രീ 17-ാം വാര്‍ഷികാഷോഷത്തിന്റെ ഭാഗമായാണ് രാധയ്ക്കും മക്കള്‍ക്കും പ്രവര്‍ത്തകര്‍ വീടൊരുക്കിയത്. കുടുംബശ്രീ പ്രവര്‍ത്തകര്‍ക്കൊപ്പം വിവിധ സന്നദ്ധസംഘടനകളും പദ്ധതിയില്‍ പങ്കാളികളായി. ചടങ്ങില്‍ ജില്ലാ പഞ്ചായത്ത് വികസനകാര്യ അധ്യക്ഷന്‍ പി.ജി ജോര്‍ജ് മാസ്റ്റര്‍, ബ്ലോക്ക് പ്രസിഡന്റ് കെ. സജിത്ത്, ഡി.എം.സി ജില്ലാ മിഷന്‍ കോഡിനേറ്റര്‍ സൈദ് അക്ബര്‍ ബാദ്ഷാഖാന്‍ സംബന്ധിക്കും.
പത്രസമ്മേളനത്തില്‍ ഗ്രാമപഞ്ചായത്ത് പ്രസിഡന്റ് അന്നമ്മ ജോര്‍ജ്, വൈസ് പ്രസിഡന്റ് പി.പി ചന്ദ്രന്‍, പി സുരേന്ദ്രന്‍ മാസ്റ്റര്‍, സി.ഡി.എസ് ചെയര്‍പേഴ്‌സണ്‍ ഗ്രേസി തങ്കച്ചന്‍, വൈസ് ചെയര്‍പേഴ്‌സണ്‍ ചന്ദ്രി കെ.ടി, ഗ്രാമപഞ്ചായത്തംഗങ്ങളായ കെ.ടി സുരേഷ്, മായ പുല്ലാട്ട് തുടങ്ങിയവര്‍ പങ്കെടുത്തു.