തിരുവനന്തപുരം:പതിനാല് തദ്ദേശ സ്വയംഭരണ വാര്‍ഡുകളില്‍ ഇന്ന് ഉപതെരഞ്ഞെടുപ്പ് നടക്കും. തിരുവനന്തപുരം ജില്ലാ പഞ്ചായത്തില്‍ കിഴുവിലം വാര്‍ഡ്, അതിയന്നൂര്‍ ഗ്രാമപഞ്ചായത്തില്‍ മരുതംകോട് വാര്‍ഡ്, മടവൂര്‍ ഗ്രാമപഞ്ചായത്തില്‍ സീമന്തപുരം വാര്‍ഡ്, കൊല്ലം- കോര്‍പറേഷന്‍, കയ്യാലയ്ക്കല്‍ വാര്‍ഡിലും, തെരഞ്ഞെടുപ്പ് നടക്കും.
ഇടുക്കി മാങ്കുളം ഗ്രാമപഞ്ചായത്തിലെ അമ്പതാം മൈല്‍ വാര്‍ഡ്, കാമാക്ഷി ഗ്രാമപഞ്ചായത്തില്‍ കാല്‍വരി മൗണ്ട് വാര്‍ഡ്, തൃശ്ശൂര്‍ ജില്ലാപഞ്ചായത്തില്‍ കൈപ്പമംഗലം വാര്‍ഡ്, വടക്കേക്കാട് ഗ്രാമപഞ്ചായത്തില്‍ ഞമനേങ്ങാട് വാര്‍ഡ്, ദേശമംഗലം ഗ്രാമപഞ്ചായത്തില്‍ പല്ലൂര്‍ ഈസ്റ്റ് വാര്‍ഡ്,  പാലക്കാട് മുനിസിപ്പാലിറ്റിയില്‍ മേപ്പറമ്പ് വാര്‍ഡ്, കോഴിക്കോട് കോര്‍പറേഷനില്‍ അരീക്കാട് വാര്‍ഡ്, മാനന്തവാടി ബ്ലോക്ക് പഞ്ചായത്തില്‍ തിരുനെല്ലി വാര്‍ഡ്, തൃക്കരിപ്പൂര്‍ ഗ്രാമപഞ്ചായത്തില്‍ ആയിറ്റി വാര്‍ഡിലുമാണ് ഉപതെരഞ്ഞെടുപ്പ് നടക്കുന്നത്.
വോട്ട് ചെയ്യുന്നതിന് കേന്ദ്ര തെരഞ്ഞെടുപ്പ്  കമ്മിഷന്‍ നല്‍കിയിട്ടുള്ള തിരിച്ചറിയല്‍ കാര്‍ഡ്, പാസ്‌പോര്‍ട്ട്, ഡ്രൈവിങ് ലൈസന്‍സ്, പാന്‍ കാര്‍ഡ്, ആധാര്‍ കാര്‍ഡ്, ഫോട്ടോ പതിച്ചിട്ടുള്ള എസ്.എസ്.എല്‍.സി ബുക്ക്, ഏതെങ്കിലും ദേശസാല്‍കൃത ബാങ്കില്‍ നിന്നും തിരഞ്ഞെടുപ്പിനും ആറുമാസത്തിന് മുമ്പു നല്‍കിയിട്ടുള്ള ഫോട്ടോ പതിച്ച പാസ്ബുക്ക്, സംസ്ഥാന തിരഞ്ഞെടുപ്പ് കമ്മിഷന്‍ നല്‍കിയിട്ടുള്ള തിരിച്ചറിയല്‍ കാര്‍ഡ്. എന്നിവയില്‍ ഏതെങ്കിലും ഒന്ന് നിര്‍ബന്ധമാണ്.
വോട്ടെടുപ്പ് രാവിലെ ഏഴു മണിക്ക് ആരംഭിച്ച് വൈകിട്ട് അഞ്ചിന് അവസാനിക്കും. നാളെ രാവിലെ പത്തു മണിക്കാകും വോട്ടെണ്ണല്‍ ആരംഭിക്കുക.