കോഴിക്കോട്: മലബാര്‍ ക്രിസ്ത്യന്‍ കോളജിനു സമീപത്തെ കിളിയനാട് ഗവ.സ്‌കൂളില്‍ പ്രവര്‍ത്തിച്ചിരുന്ന ജില്ലാ സെന്‍ട്രല്‍ ലൈബ്രറിയുടെ പ്രവര്‍ത്തനം ആനക്കുളം സാംസ്‌കാരിക നിലയത്തിലേക്ക്് മാറ്റി.
ലൈബ്രറി പ്രവര്‍ത്തിച്ചിരുന്ന കെട്ടിടം നശിച്ചു തുടങ്ങിയതിനാലും മാനാഞ്ചിറ വെള്ളിമാട്കുന്ന്് റോഡ് വികസനത്തിന്റെ ഭാഗമായി ആ കെട്ടിടം പൊളിച്ചു മാറ്റേണ്ടതിനാലുമാണ് ലൈബ്രറി ആനക്കുളത്തേക്ക് മാറ്റിയത്. ലൈബ്രറിക്കായുള്ള പുതിയ കെട്ടിടത്തിന്റെ പണി പൂര്‍ത്തിയാകുന്നതുവരെ പ്രവര്‍ത്തിക്കാന്‍ സൗകര്യപൂര്‍വമായ ഒരു കെട്ടിടം ഒരുക്കിത്തരാന്‍ കോര്‍പ്പറേഷന്‍ മേയറോട് ആവശ്യപ്പെട്ടിരുന്നു.
ഇതിനെത്തുടര്‍ന്നാണ് നടപടി. ആനക്കുളം നിലയത്തില്‍ നടന്ന ലൈബ്രറിയുടെ പ്രവര്‍ത്തനോദ്ഘാടനം മേയര്‍ തോട്ടത്തില്‍ രവീന്ദ്രന്‍ ഉദ്ഘാടനം ചെയ്തു.
ജില്ലാ സെന്‍ട്രല്‍ ലൈബ്രറി പ്രസിഡന്റ് ചൂലൂര്‍ ഗോപാലകൃഷ്ണന്‍ അധ്യക്ഷനായി. കോര്‍പ്പറേഷന്‍ സ്റ്റാന്റിങ് കമ്മിറ്റി ചെയര്‍മാന്‍ എം.സി അനില്‍കുമാര്‍, എന്‍. ശങ്കരന്‍, പി.ബി മുരളീധരന്‍, കെ.ചന്ദ്രന്‍, എന്‍.ഗംഗാധരന്‍ സംസാരിച്ചു.