എടവണ്ണ: സമസ്ത കോഡിനേഷന്‍ കമ്മിറ്റിയുടെ നേതൃത്വത്തില്‍ നാലിന് മലപ്പുറത്ത് വെച്ച് നടക്കുന്ന ലക്ഷങ്ങള്‍ പങ്കെടുക്കുന്ന ശരീഅത്ത് സംരക്ഷണ റാലിയുടെയും പൊതുസമ്മേളനത്തിന്റെയും ഭാഗമായുള്ള നേതൃസംഗമം എടവണ്ണയില്‍ നടന്നു. ഏറനാട്, മഞ്ചേരി , വണ്ടൂര്‍, നിലമ്പൂര്‍ മണ്ഡലങ്ങളിലെ പ്രധാന പ്രവര്‍ത്തകര്‍ ചടങ്ങില്‍ സംബന്ധിച്ചു. എടവണ്ണ റസ്റ്റ്ഹൗസ് പരിസരത്ത് ചേര്‍ന്ന യോഗം സത്താര്‍ പന്തല്ലൂര്‍ ഉദ്ഘാടനം ചെയ്തു.എസ്.വൈ.എസ് സംസ്ഥാന സെക്രട്ടറി കെ.എ റഹ്മാന്‍ ഫൈസി അധ്യക്ഷനായി. സി.എം കുട്ടി സഖാഫി, എം.സുല്‍ഫിക്കര്‍ അരീക്കോട്, ഉമര്‍ ദര്‍സി തച്ചണ്ണ, ഫരീദ് റഹ്മാനി, സുലൈമാന്‍ ഫൈസി ചുങ്കത്തറ, സി.അബ്ദുള്ള മൗലവി, അബ്ദുല്‍ ഹമീദ് ഫൈസി എളങ്കൂര്‍, സി.ടി അബ്ദുല്‍ ജലീല്‍, എം .പി കടുങ്ങല്ലൂര്‍ സംസാരിച്ചു. റാലിയുടെ പ്രചാരണാര്‍ഥം മണ്ഡലംതലങ്ങളില്‍ യോഗം നടത്താന്‍ തീരുമാനിക്കുകയും കണ്‍വീനര്‍മാരെ തെരഞ്ഞെടുക്കുകയും ചെയ്തു. വണ്ടൂര്‍ 24നും (കണ്‍വീനര്‍ ഫരീദ് റഹ്മാനി ), നിലമ്പൂരില്‍ 25 നും (സുലൈമാന്‍ ഫൈസി ചുങ്കത്തറ), മഞ്ചേരി (ഹമീദ് ഫൈസി), ഏറനാട് 26 നും (എം.സുല്‍ഫിക്കര്‍) നടക്കും.