തൊടുപുഴ: കരിമണ്ണൂര്‍ മേഖലയില്‍ വീടുകളില്‍ കവര്‍ച്ച നടത്തിയ നാടോടി സ്ത്രീകള്‍ പൊലിസ് പിടിയിലായി. കരിമണ്ണൂര്‍ ടൗണിന് സമീപമുള്ള വീടുകളില്‍ കൂട്ടത്തോടെയെത്തിയ ഇവര്‍ പാത്രങ്ങളും മറ്റും കൈക്കലാക്കുകയായിരുന്നു.
വീട്ടുകാര്‍ കരിമണ്ണൂര്‍ പൊലിസ് സ്റ്റേഷനില്‍ അറിയിച്ചതിനെ തുടര്‍ന്ന് നടത്തിയ അന്വേഷണത്തില്‍ മുളപ്പുറത്തു നിന്നും ഇവരെ പിടികൂടുകയായിരുന്നു. മോഷ്ടാക്കളെക്കുറിച്ച് പൊലിസില്‍ അറിയിച്ചപ്പോള്‍ വാഹനമില്ലെന്ന മറുപടിയാണ് ആദ്യം ലഭിച്ചത്. തുടര്‍ന്ന് നാട്ടുകാര്‍ സ്വകാര്യ വാഹനങ്ങളുമായി പൊലിസ് സ്റ്റേഷനിലെത്തി.
പൊലിസുദ്യോഗസ്ഥരെ കൂട്ടിക്കൊണ്ടു പോയാണ് മോഷ്ടാക്കളായ സ്ത്രീകളെ പിടികൂടിയത്. വാഹനമില്ലെന്ന മറുപടി നല്‍കിയത് പൊലിസ് സേനക്ക് നിരക്കുന്ന പ്രവര്‍ത്തിയല്ലെന്ന് ഉന്നത ഉദ്യോഗസ്ഥര്‍ പറഞ്ഞു.
ഇതേ കുറിച്ച് അന്വേഷണം ആരംഭിച്ചിട്ടുണ്ട്. ജനങ്ങള്‍ക്ക് സുരക്ഷിതത്വം ഒരുക്കേണ്ടവര്‍ അനാസ്ഥ കാണിക്കുന്നത് ഗൗരവമായിട്ടാണു കാണുന്നത്.