മാഡ്രിഡ്: സ്പാനിഷ് ലാ ലിഗയില്‍ നിര്‍ണായക വിജയം സ്വന്തമാക്കി റയല്‍ മാഡ്രിഡ് മുന്നേറ്റം തുടരുന്നു. അത്‌ലറ്റിക്ക് ബില്‍ബാവോയെ ഒന്നിനെതിരേ രണ്ടു ഗോളുകള്‍ക്കു കീഴടക്കി അവര്‍ ഒന്നാം സ്ഥാനം നിലനിര്‍ത്തി. ഏഴാം മിനുട്ടില്‍ കരിം ബെന്‍സമയിലൂടെ ലീഡെടുത്ത റയലിനെ 27ാം മിനുട്ടില്‍ തന്നെ സമനിലയില്‍ തളയ്ക്കാന്‍ ബില്‍ബാവോയ്ക്ക് സാധിച്ചിരുന്നു. മെറീനോ സാബിനാണ് ബില്‍ബാവോയെ ഒപ്പമെത്തിച്ചത്. എന്നാല്‍ പകരക്കാരനായി ഇറങ്ങിയ ആല്‍വരൊ മൊറാറ്റ കളി അവസാനിക്കാന്‍ ഏഴു മിനുട്ടുകള്‍ ശേഷിക്കെ നേടിയ ഗോളാണ് റയലിനു വിജയം സമ്മാനിച്ചത്.  
75ാം മിനുട്ടില്‍ ബെന്‍സമയെ പിന്‍വലിച്ചാണ് കോച്ച് സിദാന്‍ മൊറാറ്റയെ ഇറക്കിയത്. 83ാം മിനുട്ടില്‍ ബെയ്ല്‍ നല്‍കിയ ക്രോസില്‍ നിന്നു മൊറാറ്റയുടെ ഹാഫ് വോളിയിലൂടെയുള്ള ഗോള്‍ ശ്രമം ബില്‍ബാവോ ഗോള്‍ തട്ടിയകറ്റി. റീബൗണ്ടായി വന്ന പന്ത് നേരെ മൊറാറ്റയുടെ പക്കല്‍ തന്നെ ലഭിച്ചു. മുന്‍ യുവന്റസ് താരത്തിന്റെ ക്ലോസ് റേഞ്ച് ഷോട്ടിനു മുന്നില്‍ ഇത്തവണ ഗോള്‍ കീപ്പര്‍ നിഷ്പ്രഭന്‍.
ലീഗില്‍ ഒന്‍പതു മത്സരങ്ങള്‍ പൂര്‍ത്തിയായപ്പോള്‍ 21 പോയിന്റുമായി റയല്‍ മാഡ്രിഡ് ഒന്നാം സ്ഥാനത്ത്. കഴിഞ്ഞ ദിവസം അത്‌ലറ്റിക്കോ മാഡ്രിഡിനെ ഒരു ഗോളിനു തോല്‍പ്പിച്ച് 20 പോയിന്റുകളുമായി സെവിയ്യ രണ്ടാം സ്ഥാനത്തേക്ക് കയറി. 19 പോയിന്റുമായി ബാഴ്‌സലോണ മൂന്നാം സ്ഥാനത്ത്. സെവിയ്യയോടു തോറ്റ അത്‌ലറ്റിക്കോക്ക് നഷ്ടം സംഭവിച്ചു. 18 പോയിന്റുകളുമായി അവര്‍ അഞ്ചാം സ്ഥാനത്തേക്കിറങ്ങി. ലാസ് പല്‍മാസിനെ കീഴടക്കി വിയ്യാറല്‍ നാലാം സ്ഥാനം പിടിച്ചെടുത്തു.