മലപ്പുറം: കെട്ടിടവും അനുബന്ധ സൗകര്യങ്ങളും ഒരുക്കിയിട്ടും ജീവനക്കാരെ നിയമിക്കാത്തതു മൂലം പ്രവര്‍ത്തനമാരംഭിക്കതെ മലപ്പുറത്തെ പബ്ലിക് ഹെല്‍ത്ത് ലാബ്. ഇവടെ തസ്തിക സൃഷ്ടിക്കുന്നതിനുള്ള പ്രൊപ്പോസല്‍ പരിഗണനയിലുണ്ടെന്ന് ആരോഗ്യവകുപ്പ് മന്ത്രി ശൈലജ ടീച്ചര്‍. ഇതുസംബന്ധിച്ച് നിയമസഭയില്‍ പി. ഉബൈദുള്ള എം.എല്‍.എയുടെ ചോദ്യത്തിന് മറുപടിയായാണ് മന്ത്രി ഇക്കാര്യം അറിയിച്ചത്.
ലാബിന്റെ പ്രവര്‍ത്തനം ആരംഭിക്കാന്‍ വേണ്ടത് ഒരു മെഡിക്കല്‍ ഓഫിസറും രണ്ട് ജൂനിയര്‍ സയന്റിഫ്ക് ഓഫിസര്‍മാരും നാല് ലാബ് ടെക്‌നീഷ്യന്‍മാരും രണ്ട് ഹോസ്പിറ്റല്‍ അറ്റന്‍ഡന്റുമാരും രണ്ട് ജൂനിയര്‍ ലാബ് അസിസ്റ്റന്റുമാരും ഒരു എല്‍.ഡി ക്ലര്‍ക്കും ഒരു പ്യൂണുമാണ്. ലാബിന്റെ പ്രവര്‍ത്തനം തുടങ്ങാനുള്ള ചുരുങ്ങിയ തസ്തികയാണിത്. തസ്തിക സൃഷ്ടിക്കുന്ന മുറയ്ക്ക് ലാബിന്റെ പ്രവര്‍ത്തനം തുടങ്ങാനാകുമെങ്കിലും സാമ്പത്തിക പ്രതിസന്ധിയാണ് ഇതിനുതടസമായിനില്‍ക്കുന്നത്.
2012ല്‍ അനുമതി ലഭിച്ച ഹെല്‍ത്ത് ലാബ് കെട്ടിടം ഇന്നും അടഞ്ഞുകിടക്കുകയാണ്. പബ്ലിക് ഹെല്‍ത്ത് ലാബ് പ്രവര്‍ത്തന സജ്ജമായാല്‍ അതു ജില്ലയുടെ ആരോഗ്യമേഖലയ്ക്കു മുതല്‍ക്കൂട്ടാകും. പകര്‍ച്ചവ്യാധിയുള്‍പ്പടെയുള്ള രോഗങ്ങളുടെ നിര്‍ണയം വേഗത്തിലാകും. കൃത്യസമയത്തു ചികിത്സലഭ്യമാകുന്നതിന് ഏറെ പ്രയോജനപ്പെടും. ഡെങ്കിപ്പനി, എലിപ്പനി പോലുള്ള പകര്‍ച്ചവ്യാധികള്‍ നിര്‍ണയിക്കാനും എത്രമാത്രം ശരീരത്തെ ബാധിച്ചിട്ടുണ്ടെന്നും ഏതു തരമാണെന്നും എളുപ്പത്തില്‍ കണ്ടെത്താനുള്ള സംവിധാനങ്ങള്‍ ലാബിലുണ്ടാകും.
നിലവില്‍ കോഴിക്കോടിനേയും ഗൗരവതരമായ കേസുകളില്‍ തിരുവനന്തപുരം ലാബിനേയുമാണ് ജില്ലയിലെ രോഗികള്‍ ആശ്രയിക്കുന്നത്. ആശുപത്രികളില്‍നിന്നു പരിശോധനയ്ക്കയച്ചാല്‍ ഫലം വരണമെങ്കില്‍ പലപ്പോഴും പത്തു ദിവസത്തിലധികമെടുക്കും. പാവപ്പെട്ട രോഗികള്‍ക്ക് ആശ്വാസമാകുന്ന പബ്ലിക് ഹെല്‍ത്ത് ലാബ് ഉടന്‍ തുറന്നു പ്രവര്‍ത്തിക്കണമെന്നാണ് പൊതുവികാരം.