കൊണ്ടോട്ടി: വിശ്വാസകാര്യങ്ങളില്‍ മാത്രമല്ല, അന്യന്റെ മുന്നില്‍ കൈനീട്ടാതെ അധ്വാനിച്ചു ജീവിക്കാനും അന്ധര്‍ക്കു തൊഴിലും ആത്മവിശ്വാസവും നല്‍കുകയാണ് പുളിക്കല്‍ പൂവത്തിക്കോട്ടയില്‍ പ്രവര്‍ത്തിക്കുന്ന ഗ്ലോബല്‍ ഇസ്‌ലാമിക് ഫൗണ്ടേഷന്‍ ഫോര്‍ ദി ബ്ലൈന്‍ഡ് (ജിഫ് ബി).
ലോകത്തിന്റെ വിസ്മയ കാഴ്ചകള്‍ കാണാനാകാതെ ഇരുട്ടില്‍ കഴിയുന്നവരെ ഖുര്‍ആനിന്റെ വിശാല ലോകത്തേക്കു കണ്ണുതുറപ്പിക്കുകയും ആര്‍ക്കുമുന്നിലും തോല്‍ക്കാതെ ജീവിക്കാന്‍ അവരെ പ്രാപ്തരാക്കുകയും ചെയ്യുകയെന്ന ലക്ഷ്യത്തോടെയാണ് ജിഫ്ബിയുടെ  പ്രവര്‍ത്തനം. 2001 മെയ് രണ്ടിനാണ്അസ്വബാഹ് സൊസൈറ്റി ഫോര്‍ ദി ബ്ലൈന്‍ഡ് രൂപീകരിക്കപ്പെത്. കോഴിക്കോട് നല്ലളം  ആസ്ഥാനമായി പ്രവര്‍ത്തനമാരംഭിച്ച അസ്വബാഹ് പിന്നീട് മലപ്പുറം ജില്ലയിലെ പുളിക്കലിലേക്കു മാറ്റുകയും ആലുങ്ങലില്‍ സൗജന്യമായി ലഭിച്ച കെട്ടിടങ്ങള്‍ ഉപയോഗപ്പെടുത്തി പ്രവര്‍ത്തിച്ചു  വരികയുമാണ്.
കാഴ്ചയില്ലാത്തവര്‍ക്ക് ആത്മീയ പഠനം നല്‍കുന്നതോടൊപ്പം തൊഴില്‍ മേഖലയിലേക്കും ഇവരെ കൈപിടിച്ചു നടത്തുന്നു. കുട, ഫയല്‍പാഡ് നിര്‍മാണം, കംപ്യൂട്ടര്‍, ഇന്റര്‍നെറ്റ്, അന്ധസൗഹൃദ മൊബൈല്‍  ഉപയോഗം തുടങ്ങിയവയിലും പരിശീലനം നല്‍കുന്നുണ്ട്. കാഴ്ചവൈകല്യം ബാധിച്ച വനിതകള്‍ക്കു ഹോസ്റ്റലും ജിഫ്ബി കാംപസില്‍  ആരംഭിക്കും.ഇതില്‍ അന്ധസ്ത്രീകള്‍ക്ക് പ്രത്യേക  പരിരക്ഷയും പഠന തൊഴില്‍ പരിശീലനവും നല്‍കും. ഹോസ്റ്റല്‍ കെട്ടിടോദ്ഘാടനവും കാഴ്ചയില്ലാത്തവരുടെ അഖിലേന്ത്യാ സംഗമവും 28, 29, 30 തിയതികളില്‍ നടക്കും.
ജിഫ്ബി എക്‌സലന്‍സി അവാര്‍ഡ് ഏറ്റുവാങ്ങല്‍, ജിഫ്ബി മെയിന്‍ ബ്ലോക്ക് കം ബ്രെയിലി പ്രസ് കോംപ്ലക്‌സ് ശിലാസ്ഥാപനം,  വൊക്കേഷണല്‍ ട്രെയിനിങ് സെന്റര്‍ ഉദ്ഘാടനം, യുവജന, വിദ്യാര്‍ഥി, വനിതാ സമ്മേളനങ്ങള്‍, ഇന്റര്‍‌സ്റ്റേറ്റ് കോണ്‍ഫറന്‍സ്, പ്രതിഭകളെ ആദരിക്കല്‍, സുവനീര്‍ പ്രകാശനം തുടങ്ങിയ പരിപാടികള്‍  നടക്കും.