നീലേശ്വരം: കോട്ടപ്പുറം ഗവ.വൊക്കേഷണല്‍ ഹയര്‍സെക്കന്‍ഡറി സ്‌കൂള്‍ വികസനത്തിനായി നീക്കിവച്ച സ്ഥലത്തു തീയറ്റര്‍ കോംപ്ലക്‌സ് നിര്‍മിക്കാനുള്ള നഗരസഭയുടെ നീക്കത്തിനെതിരെ മുസ്‌ലീം ലീഗ് പ്രക്ഷോഭത്തിലേക്ക്. കഴിഞ്ഞ ദിവസം നടന്ന എം.എസ്.എഫ് യോഗത്തിന്റെ ഭാഗമായുള്ള പൊതുയോഗത്തില്‍ ലീഗ് നേതാവും മുന്‍ കൗണ്‍സലരുമായ ഇബ്രാഹിം പറമ്പത്താണ് ഇക്കാര്യം പ്രഖ്യാപിച്ചത്. സ്‌കൂളിനായി മാറ്റിവച്ച സ്ഥലത്തു തീയറ്റര്‍ കോംപ്ലക്‌സ് പണിയാനുള്ള നീക്കം സുപ്രഭാതം റിപ്പോര്‍ട്ടു ചെയ്തിരുന്നു.
പ്രശ്‌നം ചര്‍ച്ച ചെയ്യാന്‍ സ്‌കൂള്‍ പി.ടി.എ എക്‌സി.യോഗം ഇന്നു ചേരും. യോഗത്തില്‍ ഭാവികാര്യങ്ങള്‍ തീരുമാനിക്കും. സംസ്ഥാന ചലച്ചിത്ര വികസന കോര്‍പ്പറേഷന്റെ കീഴിലാണു ഇവിടെ തീയറ്റര്‍ സ്ഥാപിക്കുന്നത്. ഇതിന്റെ ഭാഗമായി കോര്‍പറേഷന്‍ ചെയര്‍മാന്‍ ലെനിന്‍ രാജേന്ദ്രനും സംഘവും കഴിഞ്ഞ ദിവസം സ്ഥലം സന്ദര്‍ശിച്ചിരുന്നു. നഗരസഭയുടെ കീഴില്‍ നഗരത്തിന്റെ ഹൃദയഭാഗത്തു തന്നെ മറ്റു സ്ഥലങ്ങളുണ്ടെന്നിരിക്കെയാണു കോട്ടപ്പുറത്തെ സ്ഥലം ഇതിനായി കണ്ടെത്തിയിരിക്കുന്നത്.