തലശ്ശേരി: തലശ്ശേരിയില്‍ കഴിഞ്ഞദിവസം പിടിയിലായ ക്വട്ടേഷന്‍ സംഘത്തിനു മംഗളൂരുവിലെ അധോലോക നായകന്‍ കാലിയ റഫീഖുമായി ബന്ധമുണ്ടെന്നു പൊലിസ് കണ്ടെത്തി. ക്വട്ടേഷന്‍ സംഘത്തെക്കുറിച്ച് കൂടുതല്‍ അന്വേഷണം നടത്താന്‍ ജില്ലാ പൊലിസ് ചീഫിന്റെ കിഴിലുള്ള ക്രൈംസ്‌ക്വാഡ് കര്‍ണാടകയില്‍ രണ്ടുദിവസമായി അന്വേഷണം നടത്തി വരികയാണ്. അതിനിടെ കഴിഞ്ഞദിവസം പിടിയിലായ ക്വട്ടേഷന്‍ സംഘത്തെ കൂടുതല്‍ ചോദ്യംചെയ്യാന്‍ വിട്ടുകിട്ടണമെന്ന് ആവശ്യപ്പെട്ട് തലശ്ശേരി പൊലിസ് കോടതിയില്‍ ഹരജി നല്‍കി.
മംഗളൂരുവിലെ ഗുണ്ടാത്തലവനും നിരവധി ക്രമിനല്‍ കേസുകളിലെ പ്രതികൂടിയായ ഉഡുപ്പി പടുവദ്രിയിലെ റസീന്‍ (29), കണ്ണൂര്‍ കുടുക്കിമൊട്ടയിലെ കൊട്ടാഞ്ചേരി റയീസ് (25), കാസര്‍കോട് ഉപ്പള നയാബസാറിലെ ബിലാല്‍ (18), ഉഡുപ്പി പടുവദ്രിയിലെ മുഹമ്മദ് അസ്‌വാന്‍ (29) ഉഡുപ്പി ഷിര്‍വയിലെ അബ്ദുല്‍ സമദ് (24), ഉഡുപ്പി ഷിര്‍വയിലെ ഇക്ബാല്‍ (27) എന്നിവരെയാണു 22നു പൊലിസ് അറസ്റ്റുചെയ്തത്. ഇതില്‍ റസീന്‍ മംഗളൂരുവിലെ അധോലോക സംഘവുമായി അടുത്ത ബന്ധമാണുള്ളതെന്നു കര്‍ണാടകയില്‍ ഇപ്പോള്‍ അന്വേഷണം നടത്തുന്ന ക്രൈംസ്‌ക്വാഡ് വെളിപ്പെടുത്തി. അധോലോക നായകന്‍ കാലിയ റഫീഖുമായി ചേര്‍ന്നു റസീന്‍ നിരവധി ക്വട്ടേഷന്‍ ഏറ്റെടുത്തിരുന്നതായും ഇയാളുമായി നിരന്തരം ബന്ധപ്പെട്ടിരുന്നതായും അന്വേഷണത്തില്‍ വ്യക്തമായിട്ടുണ്ട്.
തലശ്ശേരിയിലെ റിയല്‍ എസ്റ്റേറ്റ് വ്യാപാരി വണ്ണത്താന്‍കണ്ടി സജീറിനെ തട്ടിക്കൊണ്ടുപോകാന്‍ എത്തിയപ്പോഴാണു ക്വട്ടേഷന്‍ സംഘം തലശ്ശേരിയില്‍ പിടിയിലായത്. തലശ്ശേരിക്കാരനായ ദുബൈയില്‍ ജോലി നോക്കുന്ന റിയല്‍ എസ്റ്റേറ്റ് വ്യാപാരി മുഹസിനാണ് തട്ടിക്കൊണ്ടുപോകാന്‍ കരാര്‍ നല്‍കിയത്.  15 ലക്ഷം രൂപയാണ് സജീറിനെ  തട്ടിക്കൊണ്ടുപോകാനായി കരാറുറപ്പിച്ചത്. എസ്.പി സഞ്ജയ്കുമാര്‍ ഗുരുദ്ദീന്റെ നേതൃത്വത്തിലാണു കേസന്വേഷണം പുരോഗമിക്കുന്നത്.