നന്തിബസാര്‍: വീട്ടുമുറ്റത്ത് വിത്തെറിഞ്ഞ് നൂറുമേനി വിളയിച്ച്  മൂടാടി ടൗണിലെ ബൈത്തുല്‍ അബ്‌യളിലെ എടോത്ത് ഹംസ. വീടിന്റെ ഇരുഭാഗങ്ങിലും പത്തു സെന്റോളം വരുന്ന സ്ഥലത്തു കൃഷിഭവനില്‍ നിന്നു ലഭിച്ച പവിഴ നെല്‍വിത്താണ് തന്റെ ആദ്യപരീക്ഷണത്തിനു തിരഞ്ഞെടുത്തത്.
പ്രവാസിയായ ഹംസ ആരുടെയും സഹായമില്ലാതെ പുരയിടത്തില്‍ ജൈവവളം ഉപയോഗിച്ചു നടത്തിയ നെല്‍കൃഷി വിളവെടുക്കാന്‍ ഇനി ദിവസങ്ങള്‍ മാത്രം. തരിശായിക്കിടന്നിടത്തു കരനെല്‍കൃഷി ചെയ്താല്‍ വിജയിക്കുമെന്ന് ഹംസ പറയുന്നു. വീട്ടുവളപ്പില്‍ തന്നെ പലതരം മാവ്, സപ്പോട്ട, റുമാന്‍ എന്നിവയും സ്വന്തമായി മറ്റൊരു സ്ഥലത്തുള്ള രണ്ടേക്കറില്‍ നിറയെ കമുകുകളും ഹംസ വച്ചുപിടിപ്പിച്ചിട്ടുണ്ട്. ഭാര്യ റഷീദയും ഓസ്‌ട്രേലിയയിലുള്ള രണ്ട് ആണ്‍മക്കളുമാണ് ഹംസക്കുള്ളത്.