കാബൂള്‍: അഫ്ഗാനിസ്ഥാനില്‍ വീണ്ടും തീവ്രവാദി ആക്രമണം. അഫ്ഗാനിസ്ഥാനിലെ ഫിറോസ് ഗോ ജില്ലയില്‍ ഗോര്‍ പ്രവിശ്യയില്‍ ഐ.എസ് തീവ്രവാദികളെന്നു സംശയിക്കുന്നവര്‍ നടത്തിയ ആക്രമണത്തില്‍ 30 പേര്‍ കൊല്ലപ്പെട്ടു. കുട്ടികളടക്കം കൊല്ലപ്പെട്ടവരെല്ലാം സാധാരണക്കാരാണ്.
ഐ.എസ് കമാന്‍ഡര്‍മാര്‍ കൊല്ലപ്പെട്ടതിനു പ്രതികാരമായാണ് ആക്രമണമെന്നാണു സൂചന. ഐ.എസ് കമാന്‍ഡറായ ദാഈഷിനെ കഴിഞ്ഞ ദിവസം ഗോര്‍ പ്രവിശ്യയില്‍വച്ച് അഫ്ഗാന്‍ പൊലിസ് വെടിവച്ചു കൊന്നിരുന്നു. തുടര്‍ന്നാണ് ഐ.എസ് ഈ പ്രദേശത്തെ 30 പേരെ ബന്ദികളാക്കുകയും ശേഷം കൊലപ്പെടുത്തുകയും ചെയ്തത്. സംഭവത്തിനു പിന്നില്‍ ഐ.എസാണെന്നാണ് അധികൃതരുടെ നിഗമനമെങ്കിലും ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല.