കണ്ണൂര്‍: തീരത്തോട് ചേര്‍ന്ന് നിയമ വിരുദ്ധമായി മത്സ്യബന്ധനം നടത്തിയ രണ്ടു ബോട്ടുകള്‍ മറൈന്‍ എന്‍ഫോഴ്‌സ്‌മെന്റ് കസ്റ്റഡിയില്‍ എടുത്തു. ചെറുവത്തൂര്‍ സ്വദേശികളായ ഹരീഷിന്റെ ഉടമസ്ഥതയിലുള്ള 'ഷാന്‍ഹാസ്',  ധനീഷിന്‍െ ഉടമസ്ഥതയിലുള്ള 'ശ്രീ മുത്തപ്പന്‍' എന്നീ ബോട്ടുകളെയാണ് പടന്ന, കവ്വായി ഭാഗത്ത് വെച്ച് കരവലി നടത്തുന്നതിനിടെ പിടികൂടിയത്.
മറൈന്‍ എന്‍ഫോഴ്‌സ്‌മെന്റ് എസ്.ഐ നല്‍കിയ റിപ്പോര്‍ട്ടിന്റെ അടിസ്ഥാനത്തില്‍ കണ്ണൂര്‍ അസിസ്റ്റന്റ് ഡയറക്ടര്‍ ഓഫ് ഫിഷറീസ് കെ. അജിത ഇരു ബോട്ടുകളും ഇമ്പൗണ്ട് ചെയ്യുകയും ആന്ധ്ര സ്വദേശികളായ തൊഴിലാളികള്‍ മാത്രമുണ്ടായിരുന്ന 'ഷാന്‍ഹാസ്' എന്ന ബോട്ടിലെ മത്സ്യങ്ങള്‍ 30000 രുപയ്ക്കും ശ്രീമുത്തപ്പന്‍ എന്ന ബോട്ടിലെ മത്സ്യങ്ങള്‍ 2000 രുപയ്ക്കും ലേലം ചെയത് വിറ്റ് തുക സര്‍ക്കാറിലേക്കടയ്ക്കുകയും ചെയതു. തുടര്‍ന്ന് നടന്ന അജൂഡിക്കേഷന്‍ നടപടിയില്‍ കാസര്‍ഗോഡ് ഡപ്യൂട്ടി ഡയറക്ടര്‍ ഓഫ് ഫിഷറീസ് ഇരു ബോട്ടുകള്‍ക്കും 25000 രൂപ വീതം പിഴ വിധിക്കുകയും ചെയ്തു.
അനധികൃത മത്സ്യബന്ധനം തടയുന്നതിനായി വരും ദിവസങ്ങളില്‍ കടല്‍ പട്രോളിങ്ങ് ശക്തമാക്കുമെന്ന് മറൈന്‍ എന്‍ഫോഴ്‌സ്‌മെന്റ് എസ്.ഐ അറിയിച്ചു.