കല്‍പ്പറ്റ: വൈത്തിരി താലൂക്ക് ലൈബ്രറി കൗണ്‍സിലിന്റെ 'സര്‍ഗോത്സവം 2016' നാളെ നടക്കുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. കല്‍പ്പറ്റ എസ്.കെ.എം.ജെ ഹയര്‍സെക്കന്‍ഡറി സ്‌കൂളിലെ അലന്‍ കുര്‍ദി നഗറിലാണ് മത്സരങ്ങള്‍ നടക്കുന്നത്.
സംസ്ഥാന ലൈബ്രറി കൗണ്‍സില്‍ ഗ്രന്ഥശാലകളിലെ ബാലവേദി പ്രവര്‍ത്തകര്‍ക്കായി താലൂക്ക്-ജില്ലാ-സംസ്ഥാന തലങ്ങളില്‍ സംഘടിപ്പിക്കുന്ന കലോത്സവത്തില്‍ എല്‍.പി, യു.പി, ഹൈസ്‌കൂള്‍ വിദ്യാര്‍ഥികളാണ് മത്സരിക്കുന്നത്. ആസ്വാദന കുറിപ്പ് തയാറാക്കല്‍, കഥാപാത്ര നിരൂപണം, മലയാളം ഉപന്യാസം, ചിത്രീകരണം എന്നീ ഓഫ്‌സ്റ്റേജ് ഇനങ്ങളിലും കാവ്യാലാപനം, ചലച്ചിത്രഗാനാലാപനം, കഥാപ്രസംഗം, മോണോ ആക്ട്, മലയാളം പ്രസംഗം, നാടന്‍പാട്ട്, ലഘുനാടകം എന്നീ സ്റ്റേജ് ഇനങ്ങളിലുമായി താലൂക്കിലെ 21 ബാലവേദി കേന്ദ്ര ഗ്രന്ഥശാലകളില്‍ നിന്നുള്ള നൂറിലധികം വിദ്യാര്‍ഥികള്‍ പങ്കെടുക്കും.
ജില്ലാ ലൈബ്രറി കൗണ്‍സില്‍ സെക്രട്ടറി എം ബാലഗോപാലന്‍ ഉദ്ഘാടനം നിര്‍വഹിക്കും. രാവിലെ 10ന് കലാമത്സരങ്ങള്‍ ആരംഭിക്കും.
വൈകുന്നേരം അഞ്ചിന് നടക്കുന്ന സമാപനസമ്മേളനത്തില്‍ ചലച്ചിത്രതാരം എസ്‌തേര്‍ വിജയികള്‍ക്ക് സമ്മാനദാനം നടത്തും. വാര്‍ത്താസമ്മേളനത്തില്‍ സംഘാടകസമിതി ചെയര്‍മാന്‍ വി ഹാരിസ്, കണ്‍വീനര്‍ എസ്.സി ജോണ്‍, സെക്രട്ടറി പി.കെ ബാബുരാജ്, എ.കെ രാജേഷ്, എ.കെ മത്തായി എന്നിവര്‍ പങ്കെടുത്തു.