അല്‍ഭുതങ്ങളുടെ കലവറയായ പ്രകൃതിയില്‍ നിന്നിതാ അല്‍ഭുതപ്പെടുത്തുന്ന മറ്റൊരു വാര്‍ത്ത. സ്വിഫ്റ്റ് ഇനത്തില്‍പ്പെട്ട ഒരു ചെറുപക്ഷിക്ക് പത്തു മാസം വരെ നിര്‍ത്താതെ പറക്കാനാവുമെന്നാണ് സ്വീഡനിലെ ശാസ്ത്രജ്ഞര്‍ കണ്ടെത്തിയിരിക്കുന്നത്.

ലോകത്ത് ഏറ്റവും കൂടുതല്‍ സമയം നിലത്തിറങ്ങാതെ പക്ഷി ഇതായിരിക്കുമെന്നാണ് ശാസ്ത്രലോകം പറയുന്നത്. കറുത്ത ചിറകുകളുള്ള ചെറിയ പക്ഷിയാണിത്.

കറന്റ് ബയോളജി എന്ന യു.എസ് ജേര്‍ണലില്‍ പഠനം പ്രസിദ്ധീകരിച്ചിട്ടുണ്ട്. ബ്രീട്ടീഷ് ഗവേഷകന്‍ റോന്‍ ലോക്ക്‌ലിയാണ് ഇക്കാര്യം കണ്ടെത്തിയത്.

സ്വിഫ്റ്റ് ഇനത്തില്‍പ്പെട്ട 13 പക്ഷികളില്‍ പ്രത്യേക ചിപ്പ് ഘടിപ്പിച്ചാണ് പഠനം നടത്തിയത്. ഒരു ഗ്രാമില്‍ താഴെ മാത്രം തൂക്കമുള്ള ഈ ചിപ്പില്‍ പക്ഷി മേലെയാണോ താഴേയാണോ എന്ന കാര്യം വ്യക്തമായി പതിഞ്ഞിട്ടുണ്ട്.

പറക്കുന്നതിനിടെ തന്നെയാണ് ഈ പക്ഷി ഭക്ഷണം കണ്ടെത്തുന്നത്. എന്നാല്‍ ഇവകളുടെ ഉറക്കം എങ്ങനെയാണെന്ന കാര്യത്തില്‍ ഇപ്പോഴും സംശയം നിലനില്‍ക്കുകയാണ്.