കക്കട്ടില്‍: അനധികൃതമായി സൂക്ഷിച്ച ആടുമാടുകളുടെ മാംസാവശിഷ്ടങ്ങള്‍ പൊലിസ് പിടികൂടി. ഭക്ഷ്യോല്‍പ്പന്നങ്ങള്‍ നിര്‍മിക്കാന്‍ മാംസം സംസ്‌കരിച്ച് പൊടിയാക്കി ഡല്‍ഹിയിലേക്കു കയറ്റിയയക്കുന്ന നരിപ്പറ്റ പഞ്ചായത്തിലെ മുണ്ടോങ്കണ്ടിയിലെ കേന്ദ്രത്തിലാണ് കുറ്റ്യാടി പൊലിസും ആരോഗ്യ വകുപ്പ് അധികൃതരും റെയ്ഡ് നടത്തിയത്.
 അമോണിയ പോലുള്ള രാസവസ്തുക്കള്‍ ഉപയോഗിച്ച് സംസ്‌കരിക്കുന്ന കേന്ദ്രമാണിത്. സംഭവത്തില്‍ ഇവിടത്തെ തൊഴിലാളികളായ ഉത്തര്‍പ്രദേശിലെ ബാദ്പൂര്‍ സ്വദേശികളായ ഷഹസാദ് അലി (25), നദീം (22) എന്നിവരെ പൊലിസ് അറസ്റ്റ് ചെയ്തു. അറവു കേന്ദ്രങ്ങളില്‍ നിന്നും കൊണ്ടുവരുന്ന ഉപയോഗശൂന്യമായ മാംസാവശിഷ്ടങ്ങളും എല്ലുകളും വേര്‍തിരിച്ച് ഉത്തരേന്ത്യയിലേക്കു അയക്കുകയാണ് ചെയ്യുന്നതെന്നു ഇവര്‍ പൊലിസിനോട് പറഞ്ഞു. ദുര്‍ഗന്ധത്തെ തുടര്‍ന്നു പരിസരവാസികള്‍ പരാതി നല്‍കിയതിനെ തുടര്‍ന്നായിരുന്നു റെയ്ഡ്. പരിസര പ്രദേശങ്ങളിലെ ഷവര്‍മയ്ക്ക് ഇവയാണ് ഉപയോഗിക്കുന്നതെന്ന് നാട്ടുകാര്‍ പറയുന്നു.