കൂത്തുപറമ്പ്: സിനിമാ തിയറ്റര്‍ തീവെച്ചു നശിപ്പിക്കാന്‍ ശ്രമിച്ച സംഭവത്തില്‍ യുവാവിനെ പൊലിസ് അറസ്റ്റു ചെയ്തു. സൗത്ത് നരവൂരിലെ മൂന്നാംപിലാക്കൂല്‍ വീട്ടില്‍ ബൈജു (31) വിനെയാണ് കൂത്തുപറമ്പ് എസ്.ഐ കെ.ജെ വിനോയിയും സംഘവും അറസ്റ്റു ചെയ്തത്. കണ്ണൂര്‍ റോഡില്‍ പുതുതായി പ്രവര്‍ത്തനം തുടങ്ങിയ ബേബി സിനിമാസ് തിയറ്ററിനാണ് തീവെക്കാനുള്ള ശ്രമം ഉണ്ടായത്. ഇക്കഴിഞ്ഞ ഞായറാഴ്ച്ച രാത്രി 10 ഓടെയായിരുന്നു സംഭവം. സുഹൃത്തുക്കള്‍ക്കൊപ്പം സിനിമ കാണാനെത്തിയ ബൈജുവിന് തിയറ്ററിലെ തിരക്കു കാരണം ടിക്കറ്റ് ലഭിച്ചിരുന്നില്ല. അതിനാല്‍ സെക്യൂരിറ്റി ജീവനക്കാരനുമായി വാക്കുതര്‍ക്കത്തിലേര്‍പ്പെട്ട ബൈജു തിരികെ പേയി .പിന്നീട് തനിച്ച് വീണ്ടുമെത്തി തീയറ്റര്‍ തീവെച്ചു നശിപ്പിക്കാന്‍ ശ്രമിക്കുകയായിരുന്നുവെന്ന് പൊലിസ് പറഞ്ഞു. തിയറ്ററിന്റെ പിന്‍ഭാഗം ഉണ്ടായിരുന്ന പ്ലാസ്റ്റിക് ഷീറ്റുകള്‍ കൂട്ടിയിട്ടു കത്തിക്കുകയായിരുന്നു. തീ പടര്‍ന്ന് വാട്ടര്‍ പൈപ്പിന്റെ ഒരു ഭാഗം കത്തി നശിച്ചു. ജനറേറ്റര്‍ റൂമിലും തീ ഇടാന്‍ ശ്രമം നടന്നിരുന്നു. പൈപ്പില്‍ വെള്ളം വരാതിരിക്കാന്‍ മുകളിലത്തെ നിലയില്‍ കയറി വാള്‍വും അടച്ചു. തിയറ്റര്‍ ജീവനക്കാര്‍ കണ്ടതിനെ തുടര്‍ന്നാണ് തീ അണക്കാനായത്. സിസിടിവി ദൃശ്യത്തില്‍ നിന്നാണ് പ്രതിയെ തിരിച്ചറിയാനായത്.  പ്രതിയെ രണ്ടാഴ്ചത്തേക്കു റിമാന്‍ഡ് ചെയ്തു.