കൈപ്പാട് വികസനം ഒന്നാം ഘട്ട പദ്ധതി ജനുവരിയില്‍ ആരംഭിക്കും
പഴയങ്ങാടി: കല്ല്യാശേരി മണ്ഡലത്തിലെ ഏഴോം, പട്ടുവം, ചെറുകുന്ന്, കണ്ണപുരം തുടങ്ങിയ പഞ്ചായത്തുകളില്‍ ഉള്‍പ്പെടുന്ന കൈപ്പാട് നെല്‍കൃഷിയുടെ സമഗ്ര വികസനത്തിന് നബാര്‍ഡ് അനുവദിച്ച 10.23 കോടി രൂപയുടെ പദ്ധതി ജനുവരിയില്‍ ആരംഭിക്കും. കൈപ്പാട് വികസനവുമായി ബന്ധപ്പെട്ട് കൃഷി മന്ത്രി വി.എസ് സുനില്‍കുമാറിന്റെ അധ്യക്ഷതയില്‍ തിരുവനന്തപുരത്ത് ചേര്‍ന്ന യോഗത്തിലാണ് തീരുമാനം. കൈപ്പാടിന്റെ അടിസ്ഥാന സൗകര്യത്തിനായി തയാറാക്കിയ 24 കോടി രൂപയുടെ പദ്ധതിയില്‍ ഒന്നാംഘട്ടമായി 10.23 കോടി രൂപയാണ് അനുവദിച്ചത്.
രണ്ടാംഘട്ട പദ്ധതി നബാര്‍ഡിനും സമര്‍പ്പിക്കാന്‍ തീരുമാ നിച്ചു. റൈസ് മില്ലിന് പഞ്ചായത്തുകളില്‍ സ്ഥലം കണ്ടെത്തണം. മില്ലിന് സര്‍ക്കാര്‍ സാമ്പത്തിക സഹായം നല്‍കും. കൃഷി ആവശ്യത്തിനായി സൊസൈറ്റിക്ക് വാഹനം വാങ്ങുന്നതിന് ഏഴ് ലക്ഷം രൂപ നല്‍കും.
വരമ്പിടുന്ന യന്ത്രം വാങ്ങുന്നതിനും യോഗം തീരുമാനിച്ചു. യന്ത്രം രൂപകല്‍പ്പന ചെയ്യുന്നതിനാവശ്യമായ സഹായം വകുപ്പ് ചെയ്യും. 10.23 കോടി പദ്ധതിയില്‍ ബണ്ട് ബലപ്പെടുത്തല്‍, തടയണ നിര്‍മാണം, തോടുകളുടെ ആഴം കൂട്ടല്‍, തുടങ്ങിയ പ്രവൃത്തികള്‍ ഉള്‍പ്പെടും. യോഗത്തില്‍ ടി.വി രാജേഷ് എം.എല്‍.എ, അഗ്രികള്‍ച്ചര്‍ യൂനിവേഴ്‌സിറ്റി വൈസ് ചാന്‍സലര്‍ ഡോ. പി രാജേന്ദ്രന്‍, കൃഷിവകുപ്പ് അഡീഷണല്‍ സെക്രട്ടറി വി.എസ് സുരേഷ്‌കുമാര്‍, വി.എസ് രാജീവ്(എം.ഡി, കെ.എല്‍.ഡി.സി), ഡോ. ടി വനജ, പഞ്ചായത്ത് പ്രസിഡന്റുമാരായ പി.കെ ഹസന്‍ കുഞ്ഞി(ചെറുകുന്ന്), കെ.വിരാമകൃഷ്ണന്‍(കണ്ണപുരം), ആനക്കീല്‍ ചന്ദ്രന്‍(പട്ടുവം), ഡി വിമല(ഏഴോം), കെ പത്മനാഭന്‍ (കൈപ്പാട് സൊസൈറ്റി പ്രസിഡന്റ്), സെക്രട്ടറി കെ.വി നാരായണന്‍ പങ്കെടുത്തു.