ന്യൂഡല്‍ഹി: ഒറ്റക്കുതിപ്പില്‍ 83 ഉപഗ്രഹങ്ങള്‍ ഭ്രമണപഥത്തിലെത്തിച്ച് ചരിത്രം കുറിക്കാന്‍ ഐ.എസ്.ആര്‍.ഒ തയാറെടുക്കുന്നു. അടുത്ത വര്‍ഷം ആദ്യമാണ് വിക്ഷേപണം നടക്കുകയെന്ന്  ഐ.എസ്.ആര്‍.ഒയുടെ ആന്‍ട്രിക്‌സ് കോര്‍പ്പറേഷന്‍ ചെയര്‍മാനും എം.ഡിയുമായ രാകേഷ് ശശിഭൂഷണ്‍ അറിയിച്ചു. 81 വിദേശ ഉപഗ്രഹങ്ങള്‍ക്കൊപ്പം രണ്ട് ഇന്ത്യന്‍ നിര്‍മിത ഉപഗ്രഹങ്ങളുമടക്കമുള്ള നാനോ ഉപഗ്രഹങ്ങളാണ് ശ്രീഹരിക്കോട്ടയില്‍ നിന്ന് കുതിച്ചുയരുക. ഒരേ റോക്കറ്റില്‍ വ്യത്യസ്ത ഉപഗ്രഹങ്ങളെ വ്യത്യസ്ത ഭ്രമണപഥത്തിലെത്തിച്ച് നേരത്തെ ഐ.എസ്.ആര്‍.ഒ ചരിത്രം സൃഷ്ടിച്ചിരുന്നു. പി.എസ്.എല്‍.വിയുടെ എക്‌സ്- എ വിഭാഗത്തിലുള്ള റോക്കറ്റാണ് ഉപഗ്രഹങ്ങള്‍ വിക്ഷേപിക്കാനായി ഉപയോഗിക്കുക.
ഒറ്റ വിക്ഷേപണത്തില്‍ ഐ.എസ്.ആര്‍.ഒ ഭ്രമണപഥത്തിലെത്തിച്ച പരമാവധി ഉപഗ്രഹങ്ങളുടെ എണ്ണം നിലവില്‍ ഇരുപതാണ്. 37 ഉപഗ്രഹങ്ങളെ ഒറ്റയടിക്ക് ഭ്രമണപഥത്തിലെത്തിച്ച റഷ്യയ്ക്കാണ് ഈ മേഖലയില്‍ നിലവിലെ റെക്കോഡ്. 2014 ജൂണ്‍ 22 നായിരുന്നു റഷ്യ ഈ ഉദ്യമം നടത്തിയത്.