ചെന്നൈ: വിജയത്തോടെ ദീപാവലി ആഘോഷിക്കാമെന്ന അയല്‍ക്കാരായ ചെന്നൈയിന്‍ എഫ്.സിയുടേയും കേരള ബ്ലാസ്റ്റേഴ്‌സിന്റെ മോഹം നടന്നില്ല. ഐ.എസ്.എല്ലില്‍ ഇന്നലെ നടന്ന പോരില്‍ ചെന്നൈയിന്‍- ബ്ലാസ്റ്റേഴ്‌സ് ടീമുകള്‍ ഗോള്‍രഹിത സമനിലയില്‍ പിരിഞ്ഞു.
ചെന്നൈയിന്റെ ഹോംv മൈതാനമായ ചെന്നൈ ജവഹര്‍ലാല്‍ നെഹ്‌റു സ്റ്റേഡിയത്തില്‍ നടന്ന മത്സരത്തില്‍ ഇരു പക്ഷത്തേയും പ്രതിരോധ താരങ്ങളുടെ മികവാണ് ഗോള്‍ വീഴുന്നതിനു തടസ്സമായി നിന്നത്. ഒപ്പം ബ്ലാസ്റ്റേഴ്‌സ് നിരവധി അവസരങ്ങള്‍ പാഴാക്കുകയും ചെയ്തു. ഗോവയെ അവരുടെ തട്ടകത്തില്‍ വീഴ്ത്തിയതിന്റെ ആത്മവിശ്വാസത്തിലിറങ്ങിയ ബ്ലാസ്റ്റേഴ്‌സിനു ആ മികവ് ചെന്നൈയിനെതിരേ ആവര്‍ത്തിക്കാനായില്ല. ആദ്യ പകുതിയില്‍ ചെന്നൈയിനും രണ്ടാം പകുതിയില്‍ ബ്ലാസ്റ്റേഴ്‌സും കടുത്ത ആക്രമണമാണ് പുറത്തെടുത്തത്.  കഴിഞ്ഞ കളികളിലെ താരം ബെല്‍ഫോര്‍ട്ട് മികച്ച അവസരങ്ങള്‍ നഷ്ടപ്പെടുത്തിയത് കൊമ്പന്‍മാരെ പിന്നോട്ടടിപ്പിച്ചു.
ഏഴു കളികളില്‍ ബ്ലാസ്റ്റേഴ്‌സിന്റെ മൂന്നാം സമനിലയാണിത്. ചെന്നൈയിനും മൂന്നാം സമനിലയാണ് സ്വന്തമാക്കിയത്. ഒന്‍പതു വീതം പോയിന്റുകളുമായി ചെന്നൈയിന്‍ നാലാമതും ബ്ലാസ്റ്റേഴ്‌സ് അഞ്ചാം സ്ഥാനത്തും.