തിരുവനന്തപുരം:  മാജിക്കും സര്‍ക്കസും കൈകോര്‍ത്തുകൊണ്ട് ലോകത്തിലെ ആദ്യത്തെ സ്ഥിരം മാജിക് സര്‍ക്കസ് വേദിക്ക് നാളെ  മാജിക്  പ്ലാനറ്റില്‍ തിരശീല ഉയരും. മാജിക് പ്ലാനറ്റിന്റെ രണ്ടാം വാര്‍ഷികാഘോഷങ്ങളുടെ ഭാഗമായാണ് സര്‍ക്കസ് കാസില്‍ എന്ന അപൂര്‍വ ദൃശ്യവിരുന്നിന് തുടക്കമാകുന്നത്.
ഇന്ത്യയിലാദ്യമായി സര്‍ക്കസ് അവതരിപ്പിക്കുന്നതിന് ഒരു സ്ഥിരം വേദി എന്ന ആശയമാണ് സര്‍ക്കസ്-കാസിലിലൂടെ സാക്ഷാത്കരിക്കപ്പെടുന്നത്. അമേരിക്കയിലെ ലാസ് വേഗാസിലുള്ള സര്‍ക്കസ് സര്‍ക്കസ് എന്ന സ്ഥിരം സര്‍ക്കസ് വേദിയുടെ മാതൃകയിലാണ് സര്‍ക്കസ് പ്ലാനറ്റ് രൂപകല്‍പ്പന ചെയ്തിരിക്കുന്നത്.
നാളെ വൈകുന്നേരം അഞ്ചിന്  മുഖ്യമന്ത്രി പിണറായി വിജയന്‍ ഉദ്ഘാടനം നിര്‍വഹിക്കും.  വൈദ്യുതി മന്ത്രി കടകംപള്ളി സുരേന്ദ്രന്‍ അധ്യക്ഷനാകും.  സാംസ്‌കാരിക വകുപ്പ് മന്ത്രി എ.കെ ബാലന്‍ സര്‍ക്കസ് രംഗത്തെ പ്രമുഖരായ ജെമിനി ശങ്കരന്‍, ചന്ദ്രന്‍ കോടിയേരി, സാവിത്രി, സര്‍ക്കസ് കലയുടെ പിന്നാമ്പുറവും ദുരിതവും ദു:ഖവും തൂലികയിലൂടെ പ്രതിഫലിപ്പിച്ച ശ്രീധരന്‍ ചമ്പാട് എന്നിവരെ ആദരിക്കും. ഡി.പി.ഐ കെ.വി മോഹന്‍കുമാര്‍ , മാജിക് അക്കാദമി എക്‌സിക്യുട്ടീവ് ഡയറക്ടര്‍ ഗോപിനാഥ് മുതുകാട്, ഡയറക്ടര്‍ ചന്ദ്രസേനന്‍ മിതൃമ്മല തുടങ്ങിയവര്‍ പങ്കെടുക്കും.