തിരുവനന്തപുരം: കാസര്‍കോട്ട് ആദിവാസി കുടുംബത്തിന്റെ വീടും സ്ഥലവും പിടിച്ചെടുത്ത് തുഛവിലയ്ക്ക് ലേലം ചെയ്ത കാസര്‍കോട് ജില്ലാ സഹകരണ ഹൗസിംഗ് സൊസൈറ്റി അധികൃതര്‍ക്കെതിരേ നടപടി സ്വീകരിക്കണമെന്ന് പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു. മന്ത്രി എ.കെ.ബാലന് നല്‍കിയ കത്തിലാണ് ഈ ആവശ്യമുന്നയിച്ചത്.
നീലേശ്വരം മീര്‍കാനത്ത് വലിയ വീട്ടില്‍ രാജന്റെ കുടുംബത്തെയാണ് സൊസൈറ്റി സ്ഥലം ജപ്തി ചെയ്ത് വഴിയാധാരമാക്കിയത്.
സെന്റിന് മുപ്പതിനായിരം രൂപ വില കിട്ടുന്ന ഭൂമി വെറും മൂവായിരത്തില്‍പ്പരം രൂപയ്ക്ക് ലേലം ചെയ്തു എന്നാണ് പുറത്ത് വരുന്ന വിവരം. 2002 ല്‍ 20,000 രൂപ കടം എടുത്ത രാജന്‍ 8,410 രൂപ തിരിച്ചടച്ചിരുന്നു. എന്നിട്ടും ബാങ്ക് അധികൃതര്‍ രാജന്റെ 25 സെന്റ് സ്ഥലവും വീടും ജപ്തി ചെയ്ത് കുറഞ്ഞ വിലയ്ക്ക് ലേലം ചെയ്തു. പലിശയടക്കം ബാങ്കിന് കിട്ടേണ്ട77,913 രൂപ വസൂലാക്കി. ഈ കുടുംബം ഇപ്പോള്‍ വഴിയാധാരമാണ്.
ഒരു സഹകരണ ബാങ്ക് തന്നെ കഴുത്തറുപ്പന്‍ പലിശ ഈടാക്കുകയും മനുഷ്യത്വ രഹിതമായി പെരുമാറുകയും ചെയ്ത സംഭവം ഞെട്ടിക്കുന്നതാണ്. കടാശ്വാസ പദ്ധതികള്‍ നിലവിലിരിക്കെയാണ് ഈ ക്രൂരത കാണിച്ചത്. ഇത് ഭൂമി തട്ടിപ്പായി കണ്ട് ഉത്തരവാദികള്‍ക്കെതിരേ കേസെടുക്കണമെന്നും ചെന്നിത്തല ആവശ്യപ്പെട്ടു.