മംഗളൂരു:  അജ്ഞാത സംഘം പെട്രോള്‍ ഒഴിച്ചു വീടിനു തീവച്ചു. സംഭവത്തില്‍ ഗൃഹനാഥനു പൊള്ളലേറ്റു. ഉള്ളാളിലെ  ബസ്തിപ്പടിയിലെ താരാനാഥ് യാദവി (58)നാണു പൊള്ളലേറ്റത്. ഇയാളുടെ ഒപ്പം കിടന്നുറങ്ങുകയായിരുന്ന ഭാര്യ വിദ്യ (45), മകന്‍ മിഥുന്‍ (10) എന്നിവര്‍ പൊള്ളലേക്കാതെ  രക്ഷപ്പെട്ടു. സംഭവത്തിനു പിന്നില്‍ കഞ്ചാവിന് അടിമകളായ ചിലരെന്നാണ് സൂചന.താരാനാഥിന്റെ വീട്ടിലെ കിടപ്പുമുറിയിലാണു സംഘം ഇന്നലെ രാത്രി   തീവച്ചത്. മുറിയുടെ വെന്റിലേറ്ററിലൂടെ പെട്രോള്‍ ഒഴിച്ചു തീകത്തിച്ച് അകത്തേക്കിടുകയായിരുന്നു. സംഭവത്തില്‍  കിടപ്പുമുറി കത്തിനശിച്ചു. പ്രദേശത്തു കഞ്ചാവ്  ലഹരിയില്‍ നാട്ടുകാരെ ശല്യംചെയ്യുന്ന ചിലരെ താരാനാഥ് ചോദ്യം ചെയ്തിരുന്നു. ഇതിന്റെ വൈരാഗ്യമാണു തീവെപ്പിന് പിന്നിലെന്ന് പറയപ്പെടുന്നു. താരാനാഥിന്റെ പരാതിയില്‍ പൊലിസ്  കേസെടുത്ത് അന്വേഷണം ആരംഭിച്ചു.