ന്യൂഡല്‍ഹി: ഡല്‍ഹിയില്‍ വായു മലിനീകരണത്തോത് ദീപാവലി ആഘോഷങ്ങള്‍ കൂടി കഴിഞ്ഞതോടെ 14 ഇരട്ടിയായതായി റിപ്പോര്‍ട്ട്. ദീപാവലി ആഘോഷങ്ങള്‍ക്കിടയിലെ കരിമരുന്ന പ്രയോഗങ്ങലാണ് വായു മലിനീകരണം ഇത്രയും വര്‍ധിക്കാന്‍ കാരണമായത്.

ക്യുബിക് മീറ്ററില്‍ 1600 മൈക്രോഗ്രാം മലിനീകരണമാണ് വായുവില്‍ തങ്ങിനില്‍ക്കുന്നത്. ഇത് സാധാരണ നിലയേക്കാള്‍ 14 ഇരട്ടിയാണ്.

മലിനീകരണം അധികമായതോടെ ജനങ്ങളോട് വീടുവിട്ടിറങ്ങരുതെന്ന അധികൃതര്‍ മുന്നറിയിപ്പ് നല്‍കിയിട്ടുണ്ട്. ശ്വാസകോശ, ഹൃദയ സംബന്ധമായ രോഗങ്ങള്‍ ഉള്ളവരും പ്രായമേറിയവരും പുറത്തിറങ്ങുന്നത് ഒഴിവാക്കാനാണ് അധികൃതരുടെ പ്രത്യേക നിര്‍ദേശം.

ഈ സീസണില്‍ ഇതാദ്യമായാണ് ഡല്‍ഹിയിലെ വായുവിന്റെ ഗുണമേന്മ (എയര്‍ ക്വാളിറ്റി ഇന്‍ഡെക്‌സ്) ഏറ്റവും താഴെയെത്തുന്നത്. എ.ക്യു.ഐ. പി.എം 2.5 എത്തിയാല്‍ അത് ആരോഗ്യമുള്ളവരെ പോലും പ്രതികൂലമായി ബാധിച്ചേക്കാമെന്ന് വിദഗ്ധര്‍ പറയുന്നു.
ദീപാവലി ആഘോഷങ്ങളോട് അനുബന്ധിച്ചു പടക്കങ്ങള്‍ പൊട്ടിക്കരുതെന്ന് ഡല്‍ഹി നിവാസികളോടു സംസ്ഥാന സര്‍ക്കാര്‍ അഭ്യര്‍ഥിച്ചിരുന്നു.