എടപ്പാള്‍: ജീവനക്കാരുടെ കെടുകാര്യസ്ഥത മൂലം യാത്രക്കാര്‍ പെരുവഴിയിലായി. യാത്രക്കാരുമായുണ്ടായ അഭിപ്രായവ്യത്യാസത്തെ തുടര്‍ന്നു ജീവനക്കാര്‍ ട്രിപ്പ് മുടക്കിയതാണ് പ്രശ്‌നമായത്. രാത്രി വൈകിയും പ്രശ്‌നത്തിനു പരിഹാരമായില്ല.
ഇന്നലെ രാത്രി എട്ടരയോടെ എടപ്പാള്‍ കണ്ടനകം കെ.എസ്.ആര്‍.ടി.സി ഡിപ്പോയിലാണ് സംഭവം നടന്നത്. ഇന്നലെ വൈകിട്ട് 4.40നു കോഴിക്കോട്ടുനിന്നു തിരുവനന്തപുരത്തേക്കു പുറപ്പെട്ട കെ.എസ്.ആര്‍.ടി.സി ബസ് 7.45ന് കുറ്റിപ്പുറത്തെത്തിയപ്പോള്‍ ഭക്ഷണം കഴിക്കാനായി നിര്‍ത്തിയെങ്കിലും ഏറെ സമയം കഴിഞ്ഞിട്ടും ജീവനക്കാരെത്താത്തതിനെ തുടര്‍ന്ന് യാത്രക്കാര്‍ ബഹളംവയ്ക്കുകയായിരുന്നു. തുടര്‍ന്നു ജീവനക്കാരെത്തി യാത്ര പുറപ്പെടുകയും ചെയ്തു. ബസ് കണ്ടനകം ഡിപ്പോയില്‍ കയറ്റാതെ പോകുമെന്നു ജീവനക്കാര്‍ അറിയിച്ചതിനെ തുടര്‍ന്നു കണ്ടനകത്തിറങ്ങേണ്ട യാത്രക്കാര്‍ ഒച്ചവച്ചു. ഇതോടെ ബസ് അമിതവേഗത്തിലോടിച്ചു ഡിപ്പോയില്‍ കയറ്റി നിര്‍ത്തുകയും ബ്രേക്കിനു കുഴപ്പമുള്ളതിനാല്‍ യാത്ര തുടരാനാവില്ലെന്ന് അറിയിക്കുകയുമായിരുന്നു. ഇതോടെ യാത്രക്കാര്‍ പെരുവഴിയിലായി. യാത്രക്കാരുടെ പ്രതിഷേധത്തെ തുടര്‍ന്നു പൊലിസ് സ്ഥലത്തെത്തി. രാത്രി വൈകിയും പ്രശ്‌നത്തിനു പരിഹാരമാകാത്തതിനെ തുടര്‍ന്നു കുറച്ച് യാത്രക്കാര്‍ മറ്റ് ബസുകളില്‍ യാത്ര തുടര്‍ന്നു.