അരീക്കോട്: വീട്ടിലെ ഫ്രിഡ്ജ് പൊട്ടിത്തെറിച്ചു. അയല്‍വീട്ടുകാരുടെ ഇടപെടലില്‍ വന്‍ ദുരന്തം ഒഴിവായി. അരീക്കോട് സൗത്ത് പുത്തലം പള്ളിക്കു സമീപം പൂവത്തി ഖാലിദിന്റെ വീട്ടിലെ ഫ്രിഡ്ജാണ് പൊട്ടിത്തെറിച്ചത്. ഇന്നലെ രാവിലെ 11നാണ് സംഭവം.
ഖാലിദ് ജോലിക്കും കുട്ടികളെ സ്‌കൂളിലേക്കുംവിട്ട് ഭാര്യ സഹോദരിയുടെ വീട്ടിലേക്കുംപോയ സമയത്താണ് അപകടമുണ്ടായത്. വീട്ടില്‍നിന്ന് പുക ഉയരുന്നതുകണ്ട് അയല്‍വീട്ടുകാര്‍ ഓടിയെത്തിയപ്പോഴാണ് വീട്ടില്‍ തീ ആളി പടരുന്നത് കണ്ടത്. ഉടന്‍ തീ അണക്കാനായതിനാല്‍ വന്‍ ദുരന്തമാണ് ഒഴിവായത്. റെഗുലേറ്ററില്‍ നിന്നുണ്ടായ പൊട്ടിത്തെറിയാണ് അപകടത്തിന് കാരണമായത്. റേഷന്‍ കാര്‍ഡ്, സര്‍ട്ടിഫിക്കറ്റുകള്‍, കുക്കര്‍, ഫാന്‍, വീട്ടുപകരണങ്ങള്‍ എന്നിവ പൂര്‍ണമായും കത്തി നശിച്ചു. കിടപ്പ് മുറിയിലേക്ക് തീ പടര്‍ന്നപ്പോയേക്കും അയല്‍ വീട്ടുകാര്‍ തീ അണക്കുകയായിരുന്നു.