അടിമാലി : സ്‌കൂള്‍ കുട്ടികളുമായി പോയ രണ്ട് ഓട്ടോറിക്ഷകള്‍ ദേശീയപാതയില്‍ നിയന്ത്രണം വിട്ട് മറിഞ്ഞ് പത്ത് സ്‌കൂള്‍ കുട്ടികള്‍ അടക്കം 12 പേര്‍ക്ക് പരിക്കേറ്റു.
ആരുടേയും നില ഗുരുതരമല്ല. ദേവിയാര്‍ പത്താം മൈല്‍ സര്‍ക്കാര്‍ സ്‌കൂളില്‍ നിന്നും കുട്ടികളുമായി മെഴുകുംചാലിന് പോയ ഓട്ടോറിക്ഷകളാണ് അപകടത്തില്‍പ്പെട്ടത്. രമ്യ(10), രാജി(6), ലക്ഷ്മി ബിനേഷ്, ആല്‍ബിന്‍ ജിജോ, വിഷ്ണു, സ്‌നേഹ, ആന്‍സിയ, അക്ഷര, അക്ഷയ, ജൂലി മേരി എന്നിവര്‍ക്കും,ഓട്ടോ ഡ്രൈവര്‍മാരായ മെഴുകുംചാല്‍ മുതുരയില്‍ അനീഷ്, പെരുമ്പള്ളിക്കാട്ടില്‍ ഷൈജോമോന്‍ എന്നിവര്‍ക്കുമാണ് പരിക്കേറ്റത്. ഇവരെ അടിമാലി താലൂക്കാശുപത്രിയില്‍ പ്രവേശിപ്പിച്ചു. ദേശീയപാതയില്‍ സെന്റ് ആന്റണീസ് പള്ളിയുടെ സമീപത്തുവെച്ചാണ് ഓട്ടോകള്‍ ഇടിച്ചത്. നിയന്ത്രണം വിട്ട് ഇരു വാഹനവും റോഡില്‍ മറിഞ്ഞാണ് അപകടം. കുട്ടികളെ നാട്ടുകാരും യാത്രക്കാരും അടിമാലി താലൂക്ക് ആശുപത്രിയില്‍ എത്തിച്ചു.