തൊടുപുഴ:  വിദ്യാലയങ്ങളിലെയും വിദ്യാര്‍ഥികളുടെ വീടുകളിലെയും മികച്ച പച്ചക്കറിത്തോട്ടങ്ങള്‍ക്ക് ഇന്‍ഫാം സംസ്ഥാനതലത്തില്‍ ക്യാഷ് അവാര്‍ഡ് നല്‍കുന്നു. വിദ്യാലയങ്ങളിലെ മികച്ച ആദ്യത്തെ മൂന്ന് തോട്ടങ്ങള്‍ക്ക് യഥാക്രമം 10,001, 5,001, 3,001  രൂപ ക്രമത്തിലും വിദ്യാര്‍ഥികളുടെ വീടുകളിലെ മികച്ച ആദ്യത്തെ മൂന്ന് പച്ചക്കറിത്തോട്ടങ്ങള്‍ക്ക് യഥാക്രമം 2,000, 1,500, 1000 രൂപ ക്രമത്തിലുമാണ് ക്യാഷ് അവാര്‍ഡ് നല്‍കുന്നത്.
ഇന്‍ഫാം കര്‍ഷകദിനമായ ജനുവരി 15ന് വാഴക്കുളത്ത് ചേരുന്ന സമ്മേളനത്തില്‍ കൃഷിമന്ത്രി വി.എസ് സുനില്‍കുമാര്‍ പുരസ്‌കാരവിതരണം നിര്‍വഹിക്കും. 'ജൈവകേരളം വിദ്യാര്‍ഥികളിലൂടെ' എന്ന പദ്ധതിയുടെ ഭാഗമായാണ് വിദ്യാര്‍ഥികള്‍ക്കും വിദ്യാലയങ്ങള്‍ക്കും സമ്മാനം നല്‍കുന്നതെന്ന് ഇന്‍ഫാം സംസ്ഥാന ഡയറക്ടര്‍ ഫാ. ജോസ് മോനിപ്പിള്ളില്‍, കണ്‍വീനര്‍ ജോസ് എടപ്പാട്ട് എന്നിവര്‍ അറിയിച്ചു.  അപേക്ഷകള്‍ ഡിസംബര്‍ 15നകം സമര്‍പ്പിക്കണം. ഫോണ്‍: 8547514666, 9387924030.