തൊടുപുഴ:  വണ്‍ റാങ്ക് വണ്‍ പെന്‍ഷന്‍ പദ്ധതി നടപ്പാക്കുന്നതില്‍ കേന്ദ്രസര്‍ക്കാര്‍  വിമുക്തഭടന്മാരോട് കാണിച്ച അവഗണനയെത്തുടര്‍ന്ന് ഭടന്‍ ആത്മഹത്യ ചെയ്ത  സംഭവത്തില്‍ കേന്ദ്ര സര്‍ക്കാരിന്റെ നിഷേധാത്മക നിലാപാടില്‍ വ്യാപക പ്രതിഷേധം.  കേരളാ സ്‌റ്റേറ്റ് എക്‌സ് സര്‍വീസ് ലീഗ് ജില്ലാ കമ്മിറ്റി സംഭവത്തില്‍  പ്രതിഷേധമറിയിച്ചു.
തുഛമായ ആനുകൂല്യങ്ങള്‍ മാത്രം നല്‍കി സര്‍ക്കാര്‍  ഏകപക്ഷീയമായി നടപ്പാക്കിയ പെന്‍ഷന്‍ പദ്ധതി നിരവധി ആക്ഷേപങ്ങള്‍ക്ക്  വഴിവയ്ക്കുന്നതാണെന്ന് കമ്മിറ്റി യോഗം ചൂണ്ടിക്കാട്ടി.  വിമുക്തഭടന്മാരുടെ  ആവശ്യങ്ങളില്‍ ഭൂരിഭാഗവും നിരസിച്ച സര്‍ക്കാര്‍ നിലപാടിനെതിരെ സംയുക്ത  സമരസമിതിയുടെ നേതൃത്വത്തില്‍ സമരം തുടരുകയാണ്. രാജ്യസ്‌നേഹികളായ  വിമുക്തഭടന്മാര്‍ രണ്ടുവര്‍ഷമായി തുടരുന്ന പ്രക്ഷോഭത്തെ അവഗണിക്കുകയും ന്യായമായ  ആവശ്യങ്ങള്‍ക്ക്  പരിഗണന നല്‍കാതിരിക്കുകയും ചെയ്ത സാഹചര്യത്തിലാണ്  സമരമുഖത്തുണ്ടായിരുന്ന റിട്ട. സുബേദാര്‍ രാകിഷന്‍ ഗ്രേവാള്‍ ആത്മഹത്യ ചെയ്തത്.
ശരാശരി  37 വയസില്‍ സര്‍വീസില്‍നിന്ന് വിരമിക്കേണ്ടിവന്നവരാണ് ഇന്നത്തെ വിമുക്തഭടന്മാര്‍.  ഏറ്റവും താഴത്തെ റാങ്കില്‍ വിരമിക്കേണ്ടിവരുന്നതിനാല്‍ വളരെ കുറഞ്ഞ പെന്‍ഷന്‍  മാത്രമാണ് വിമുക്തഭടന്മാര്‍ക്ക് ലഭിക്കുന്നത്. ഇത്തരം അവഗണനയ്‌ക്കെതിരെ  രാജ്യവ്യാപക പ്രക്ഷോഭത്തിന് വിമുക്തഭടന്മാര്‍ തയ്യാറകുമെന്നും യോഗം  അറിയിച്ചു.
യോഗത്തില്‍ ജില്ലാ പ്രസിഡന്റ് വി എം പൗലോസ്, സെക്രട്ടറി  സജി അഗസ്റ്റിന്‍, തൊടുപുഴ താലൂക്ക് പ്രസിഡന്റ് എ എ തോമസ്, കെ സി  അഗസ്റ്റിന്‍, എം ശിവരാമന്‍, ജോര്‍ഡി ജോസഫ്, സുകുമാരന്‍ നായര്‍, പി എന്‍  സുരേഷ്, വി കൃഷ്ണപിള്ള എന്നിവര്‍ സംസാരിച്ചു.