വളാഞ്ചേരി: മോഷണ ശ്രമത്തിനിടെ അന്യസംസ്ഥാന തൊഴിലാളിയെ നാട്ടുകാര്‍ പിടികൂടി പൊലിസില്‍ ഏല്‍പ്പിച്ചു. കഞ്ഞിപ്പുരയില്‍ കാടാമ്പുഴ റോഡിലെ പൊട്ടച്ചോല ഹുസൈന്‍ ഹാജിയുടെ വീടിന്റെ മുന്‍വശത്തെ ഗ്രില്ലിന്റെ പൂട്ടു തകര്‍ക്കുന്നതിനിടയിലാണു മോഷ്ടാവു പിടിയിലായത്.
ബംഗാള്‍ സ്വദേശി ബിപല്‍ മധു(30)വിനെയാണു നാട്ടുകാര്‍ പിടികൂടി പൊലിസില്‍ ഏല്‍പ്പിച്ചത്. ഇന്നലെ രാവിലെ 9.30നായിരുന്നു സംഭവം. ഹുസൈന്‍ ഹാജിയും കുടുംബവും മരണ വീടു സന്ദര്‍ശിക്കാന്‍ വീട് പൂട്ടിപോയ സമത്താണു മോഷണ ശ്രമം. വീടിന്റെ പിന്‍ഭാഗത്തെ ജനല്‍ ചില്ലു പൊട്ടിച്ചു ഉള്ളിലേക്കു കടക്കാനുള്ള ശ്രമം പരാജയപ്പെട്ടതിനാല്‍ പ്രതി മഴുവും ഇരുമ്പു ദണ്ഡും ഉപയോഗിച്ചു പൂട്ടു തകര്‍ക്കാന്‍ ശ്രമിക്കുന്ന ശബ്ദം കേട്ട് ഓടിക്കൂടിയ നാട്ടുകാര്‍ പ്രതിയെ പിടികൂടി പൊലിസില്‍ ഏല്‍പ്പിക്കുകയായിരുന്നു.
വളാഞ്ചേരി അഡീഷണല്‍ എസ്.ഐ. വാസുവിന്റെ നേതൃത്വത്തിലുള്ള പൊലിസ് പ്രതിയെ കസ്റ്റഡിയിലെടുത്തു. നേരത്തെയും ഇയാള്‍ പൊലിസ് പിടിയിലായിട്ടുണ്ടെങ്കിലും മാനസിക രോഗിയാണെന്നു പറഞ്ഞു വിട്ടയച്ചുവെന്നും നാട്ടുകാര്‍ പരാതിപ്പെട്ടു. വെള്ളിയാഴ്ച രാത്രിയില്‍ കഞ്ഞിപ്പുര അങ്ങാടിയിലെ സ്റ്റുഡിയോയില്‍ മോഷണം നടന്നിരുന്നു. ക്യാമറയും ലെന്‍സുകളും ഇവിടെ നിന്നും മോഷണം പോയിട്ടുണ്ട്.