ശ്രീനഗര്‍: കശ്മിരില്‍ 16കാരന്റെ മരണത്തെ തുടര്‍ന്ന് പ്രതിഷേധക്കാരും പൊലിസും തമ്മിലുള്ള ഏറ്റുമുട്ടല്‍ രൂക്ഷമാവുന്നു.12ലധികം പേര്‍ക്ക് ഏറ്റുമുട്ടലില്‍ പരുക്കേറ്റിട്ടുണ്ട്. ഈദ്ഗാഹ് മേഖലയില്‍ കൈസര്‍ സോഫി എന്ന ബാലനാണ് കൊല്ലപ്പെട്ടത്. കൈസറിനെ ഒക്ടോബര്‍ 25ന് കാണാതാവുകയും ആറു ദിവസങ്ങള്‍ക്ക് ശേഷം ഷാലിമാര്‍ മേഖലയില്‍ ഗുരുതരാവസ്ഥയില്‍ കണ്ടെത്തുകയുമായിരുന്നു. ചികിത്സയിലിരിക്കെയാണ് കഴിഞ്ഞ ദിവസം കൈസര്‍ മരിച്ചത്.
കൈസറിനെ സുരക്ഷാ സേന നിര്‍ബന്ധിപ്പിച്ച് വിഷം കഴിപ്പിച്ചെന്നും ഇതാണ് മരണത്തിലേക്ക് നയിച്ചതെന്നും പ്രതിഷേധക്കാര്‍ ആരോപിച്ചു. അതേസമയം പ്രതിഷേധക്കാരില്‍ ആറുപേര്‍ക്ക് പെല്ലറ്റ് ആക്രമണത്തിലാണ് പരുക്കേറ്റത്. ഏറ്റുമുട്ടലിനെ തുടര്‍ന്ന് വ്യാപാര സ്ഥാപനങ്ങളും പെട്രോള്‍ പമ്പുകളും അടച്ചു. പല സ്ഥലത്തും ഗതാഗതം നിര്‍ത്തിവച്ചിട്ടുണ്ട്.