ആലക്കോട്: നെല്ലിപ്പാറയില്‍ കുഴല്‍കിണര്‍ നിര്‍മ്മാണ സാമഗ്രികളുമായി പോയ ലോറി മറിഞ്ഞ് രണ്ടു ഇതര സംസ്ഥാന തൊഴിലാളികള്‍ക്ക് പരുക്കേറ്റു. ഇന്നലെ രാവിലെ എട്ടോടെയായിരുന്നു അപകടം. നെല്ലിപ്പാറ കള്ളു ഷാപ്പിന് സമീപം റോഡിന്റെ സംരക്ഷണ ഭിത്തി തകര്‍ന്നതിനെ തുടര്‍ന്ന് തൊട്ടടുത്ത വീടിനു മുകളിലേക്ക് ലോറി മറിയുകയായിരുന്നു. ഈ സമയം ലോറിയില്‍ ഉണ്ടായിരുന്ന തൊഴിലാളികള്‍ക്കാണ് പരുക്കേറ്റത്. തൊട്ടടുത്ത പറമ്പില്‍ കുഴല്‍ കിണര്‍ നിര്‍മാണത്തിനായി തൊഴിലാളികളുമായി പോകവേ കുത്തനെയുള്ള കയറ്റത്തില്‍ വച്ചായിരുന്നു അപകടം. വീതി കുറഞ്ഞ റോഡില്‍ ഭാരവും വഹിച്ചു കൊണ്ട് ലോറി കയറിയതോടെ റോഡിന്റെ സംരക്ഷണ ഭിത്തി തകര്‍ന്ന് ലോറി താഴേക്ക് പതിക്കുകയായിരുന്നു. വീടിന്റെ ചുമരില്‍ തങ്ങി നിന്നതിനാലാണ് വന്‍ ദുരന്തം ഒഴിവായത്. കൂടുതല്‍ തൊഴിലാളികള്‍ ലോറിയില്‍ ഉണ്ടായിരുന്നെങ്കിലും കയറ്റത്തില്‍ വച്ച് ഇവര്‍ ഇറങ്ങി നടന്നതിനാല്‍ വന്‍ ദുരന്തം വഴിമാറുകയായിരുന്നു. തളിപ്പറമ്പില്‍ നിന്ന് ഖലാസികള്‍ എത്തിയാണ് മണിക്കൂറുകള്‍ നടത്തിയ പരിശ്രമത്തിനൊടുവില്‍ ലോറി റോഡിലേക്ക് കയറ്റാനായത്.