തൊടുപുഴ: സംസ്ഥാനത്ത് തുലാമഴയും ലഭിക്കാത്തതിനെ തുടര്‍ന്ന് ഊര്‍ജമേഖല കടുത്ത പ്രതിസന്ധിയിലേക്ക് നീങ്ങുന്നു. വൈദ്യുതി ബോര്‍ഡ് അണക്കെട്ടുകളുടെ വൃഷ്ടിപ്രദേശങ്ങളില്‍ ഇന്നലെ ഒരുതുള്ളി മഴ പെയ്തില്ല. അണക്കെട്ടുകളിലേക്കുള്ള നീരൊഴുക്കും കുറഞ്ഞു. 3.876 ദശലക്ഷം യൂനിറ്റിനുള്ള വെള്ളം മാത്രമാണ് ഇന്നലെ അണക്കെട്ടുകളിലേക്ക് ഒഴുകിയെത്തിയത്. കഴിഞ്ഞ വര്‍ഷം ഇതേദിവസത്തേക്കാള്‍ 397.229 ദശലക്ഷം യൂനിറ്റ് വൈദ്യുതി ഉല്‍പാദിപ്പിക്കാനുള്ള വെള്ളം സംഭരണികളില്‍ കുറവാണ്.
ഇതോടെ സംസ്ഥാനത്തെ ആഭ്യന്തര വൈദ്യുതി ഉല്‍പാദനം വീണ്ടും വെട്ടിക്കുറച്ചു. 4.22 ദശലക്ഷം യൂനിറ്റ് മാത്രമായിരുന്നു ഇന്നലത്തെ ജലവൈദ്യുതി ഉല്‍പാദനം. ഇത് സമീപകാല ചരിത്രത്തിലെ കുറഞ്ഞ ഉല്‍പാദനമാണ്. ഇടുക്കി പദ്ധതിയില്‍ മാത്രമാണ് ഇന്നലെ ഒരു ദശലക്ഷം യൂനിറ്റിന് മുകളില്‍ വൈദ്യുതി ഉല്‍പാദിപ്പിച്ചത്. 1.23 ദശലക്ഷമായിരുന്നു ഇടുക്കി പദ്ധതിയുടെ മൂലമറ്റം പവര്‍ ഹൗസിലെ ഉല്‍പാദനം. 58.725 ദശലക്ഷം യൂനിറ്റായിരുന്നു സംസ്ഥാനത്തെ ഇന്നലത്തെ ഉപഭോഗം. 53.967 ദശലക്ഷം യൂനിറ്റും കേന്ദ്രപൂളില്‍ നിന്നായിരുന്നു.
2154.65 ദശലക്ഷം യൂനിറ്റ് വൈദ്യുതി ഉല്‍പാദിപ്പിക്കാനുള്ള വെള്ളമാണ് എല്ലാ സംഭരണികളിലുമായി അവശേഷിക്കുന്നത്. ഇത് സംഭരണശേഷിയുടെ 52 ശതമാനമാണ്. ഏറ്റവും വലിയ ജലവൈദ്യുത പദ്ധതിയായ ഇടുക്കിയിലെ ഇന്നലത്തെ ജലനിരപ്പ് 2347.14 അടിയാണ്.
ഇത് സംഭരണശേഷിയുടെ 43 ശതമാനമാണ്. ഈ വര്‍ഷം ഇതുവരെ ഇടുക്കി അണക്കെട്ടിലെ ജലനിരപ്പ് ശേഷിയുടെ 50 ശതമാനം കടന്നിട്ടില്ല. പമ്പ- 57 ശതമാനം, ഷോളയാര്‍- 89, ഇടമലയാര്‍- 60, കുണ്ടള- 55, മാട്ടുപ്പെട്ടി- 62, കുറ്റ്യാടി- 38, ആനയിറങ്കല്‍- 35, നേര്യമംഗലം- 63, പൊരിങ്ങല്‍- 58, പൊന്മുടി- 41, ലോവര്‍ പെരിയാര്‍- 53 ശതമാനം എന്നിങ്ങനെയാണ് മറ്റു പ്രധാന സംഭരണികളിലെ ജലനിരപ്പ്.
അതിനിടെ, വൈദ്യുതി ബോര്‍ഡ് ജലവിനിയോഗ സെല്‍ കഴിഞ്ഞദിവസം അടിയന്തര യോഗം ചേര്‍ന്ന് സ്ഥിതിഗതികള്‍ വിലയിരുത്തിയിരുന്നു. ഇപ്പോഴത്തെ സാഹചര്യം തുടര്‍ന്നാല്‍ വേനല്‍ കൂടുതല്‍ കനക്കുന്നതോടെ പുറത്തുനിന്ന് വന്‍വില നല്‍കി കൂടുതല്‍ വൈദ്യുതി വാങ്ങേണ്ടി വരും. ചിലപ്പോള്‍ ഉയര്‍ന്ന വില നല്‍കിയാലും വൈദ്യുതി കിട്ടാത്ത സ്ഥിതിയുണ്ടാകും.
ഇത് കടുത്ത പ്രതിസന്ധി സൃഷ്ടിക്കും. 1,500 കോടി മുതല്‍ 2,200 കോടി വരെ യൂനിറ്റാണ് ഓരോ വര്‍ഷവും സംസ്ഥാനത്തിന് ആവശ്യമായി വരുന്നത്. വിവിധ പദ്ധതികളില്‍ നിന്നുള്ള ഉല്‍പാദനം 600- 700 കോടി യൂനിറ്റ് മാത്രമാണ്. സോളാര്‍, വിന്‍ഡ് പദ്ധതികളില്‍നിന്ന് അഞ്ച് ശതമാനത്തില്‍ താഴെയാണ് വൈദ്യുതി ലഭിക്കുന്നത്.