കാട്ടിക്കുളം: കോളനിക്ക് സമീപം അവശനിലയില്‍ കൊമ്പനാനയെ കണ്ടെത്തി. തോല്‍പ്പെട്ടി വന്യജീവി സങ്കേതത്തില്‍ ഉള്‍പ്പെട്ട കാട്ടിക്കുളം ചേലൂര്‍ മണ്ണുണ്ടി കോളനിക്ക് സമീപത്തെ പുഴയിലാണ് ഇന്നലെ ഉച്ചയോടെ ആനയെ കണ്ടെത്തിയത്.
ഏകദേശം പതിനഞ്ച് വയസ്സ് പ്രായമുള്ള കൊമ്പന്‍ പുഴയില്‍ കിടക്കുന്നത് കോളനിവാസികളാണ് കണ്ടത്. ഇവര്‍ വിവരമറിയിച്ചതിനെ തുടര്‍ന്ന് അസി.വൈല്‍ഡ് ലൈഫ് വാര്‍ഡന്‍ എ.കെ ഗോപാലന്റെ നേതൃത്വത്തിലുള്ള വനപാലക സംഘം സ്ഥലത്തെത്തി.
കാട്ടിക്കുളം വെറ്റനറി സര്‍ജന്‍ ഡോ. ജിജിമോന്‍ നടത്തിയ പരിശോധനയില്‍ ആനയുടെ കാലിന് നീര് കണ്ടെത്തി തുടര്‍ന്ന് ചികിത്സ ആരംഭിച്ചു.
ജെ.സി.ബി ഉപയോഗിച്ച് ആനയെ ഉയര്‍ത്തിയാണ് കരയിലെത്തിച്ചത്. മറ്റ് ഭാഗങ്ങളില്‍ പരുക്കോ, വ്രണമോ ഉണ്ടോ എന്നും പരിശോധിച്ചു.