പന്തല്ലൂര്‍: യുവാവിനെ കാണാതായതായി പരാതി. പന്തല്ലൂര്‍ സ്വദേശി രാജഗുരു (31)യെയാണ് കഴിഞ്ഞ ഞായറാഴ്ച വൈകുന്നേരം കാണാതായത്. പന്തല്ലൂര്‍ താലൂക്ക് ഓഫിസില്‍ ആധാര്‍ കാര്‍ഡിന് ഫോട്ടോയെടുക്കുന്നയാളാണ്.
സഹോദരന്‍ ലോകനാഥനും രാജഗുരുവും ഞായറാഴ്ച ഇരുമ്പ്പാലത്തില്‍ സി.സി ടി.വി കാമറ പരിശോധനക്കായി പോയിരുന്നു. അതിനിടക്ക് ലോകനാഥന്‍ ചായക്കടയില്‍ ചായകുടിക്കാനായി പോവുകയായിരുന്നു. തുടര്‍ന്ന് മൂത്രമൊഴിച്ച് ഇപ്പോള്‍ വരാമെന്ന് പറഞ്ഞ് പോയ രാജഗുരുവിനെ പിന്നീട് കാണാതാവുകയായിരുന്നു. രാത്രി മുഴുവനും ബന്ധുക്കള്‍ ഇയാള്‍ക്ക് വേണ്ടി തിരച്ചില്‍ നടത്തിയെങ്കിലും കണ്ടെത്താനായില്ല.
തുടര്‍ന്ന് ഇന്നലെ രാവിലെ ദേവാല പൊലിസില്‍ പരാതി നല്‍കുകയായിരുന്നു. പാണ്ഡ്യാര്‍ പുഴയിലേക്ക് വീണിട്ടുണ്ടാകുമെന്ന വിശ്വാസത്തില്‍ അഗ്നിശമനസേനയും പൊലിസും രാവിലെ മുതല്‍ ഉച്ചക്ക് മൂന്നുവരെ തിരച്ചില്‍ നടത്തിയെങ്കിലും കണ്ടെത്താനായില്ല. തുടര്‍ന്ന് തിരച്ചില്‍ നിര്‍ത്തിവെക്കുകയായിരുന്നു.