ന്യൂഡല്‍ഹി: നിലവിലെ ചാംപ്യന്‍മാരായ ചെന്നൈയിന്‍ എഫ്.സിയെ ഒന്നിനെതിരേ നാലു ഗോളുകള്‍ക്ക് തകര്‍ത്ത് ഡല്‍ഹി ഡൈനാമോസ് നാലാം വിജയത്തോടെ ഐ.എസ്.എല്‍ പോയിന്റ് പട്ടികയില്‍ ഒന്നാം സ്ഥാനത്തേക്ക് കുതിച്ചെത്തി. രണ്ടു ഗോളുകള്‍ നേടിയും ഒരു ഗോളിനു വഴിയൊരുക്കിയും മാര്‍ക്വീ താരം ഫ്‌ളോറന്റ് മലൂദ പെരുമയ്‌ക്കൊത്ത പ്രകടനം പുറത്തെടുത്ത പോരാട്ടത്തില്‍ ഡല്‍ഹി സ്വന്തമാക്കിയ തുടര്‍ച്ചയായ മൂന്നാം ജയം കൂടിയായിരുന്നു സ്വന്തം തട്ടകത്തിലേത്. കളിയുടെ സിംഹഭാഗത്തും പന്തു കൈവശം വച്ച് കളിച്ച ഡല്‍ഹി ഒരു ഘട്ടത്തില്‍ പോലും താഴോട്ടു പോയില്ല എന്നത് ശ്രദ്ധേയമായിരുന്നു.
കളി തുടങ്ങി 15ാം മിനുട്ടില്‍ റിച്ചാര്‍ഡ് ഗാഡ്‌സെയിലൂടെ ഡല്‍ഹി മുന്നിലെത്തി. പത്തു മിനുട്ടിനുള്ളില്‍ മലൂദയിലൂടെ ഡല്‍ഹി ലീഡുയര്‍ത്തി. രണ്ടു ഗോള്‍ വീണതോടെ ആക്രമണം വര്‍ധിപ്പിച്ച ചെന്നൈയിന്‍ 37ാം മിനുട്ടില്‍ ബെര്‍ണാഡ് മെന്‍ഡിയുടെ സോളോ ഗോളിലൂടെ ലീഡ് കുറച്ചു. രണ്ടാം പകുതിയുടെ 54ാം മിനുട്ടില്‍ കീന്‍ ലെവിസ് ഡൈനമോസിനു മൂന്നാം ഗോള്‍ സമ്മാനിച്ചു. മലൂദയായിരുന്നു സൂത്രധാരന്‍. മത്സരം അവസാനിക്കാന്‍ അഞ്ചു മിനുട്ട് ബാക്കിനില്‍ക്കെ മലൂദ ചെന്നൈയിന്റെ പെട്ടിയില്‍ അവസാന ആണിയും അടിച്ചു. ഒന്‍പതു മത്സരങ്ങളില്‍ നിന്നു 16 പോയിന്റുമായാണ് ഡല്‍ഹി ഒന്നാം സ്ഥാനത്തെത്തിയത്. തോല്‍വിയോടെ ചെന്നൈയിന്‍ ആറാം സ്ഥാനത്തേക്കു വീണു.