കൊളത്തൂര്‍: പെരിന്തല്‍മണ്ണ വളാഞ്ചേരി റൂട്ടില്‍ കെ.എസ്.ആര്‍.ടി.സി ബസും സ്വകാര്യ ബസും മത്സരയോട്ടം. കെ.എസ്.ആര്‍.ടി.സി ബസ് ഓണപ്പുട മസ്ജിദിലേക്ക് പാഞ്ഞുകയറി. ഇന്നലെ വൈകിട്ട് അഞ്ചോടെയാണ് അപകടം.
മാലാപറമ്പ് എം.ഇ.എസ് മെഡിക്കല്‍ കോളജ് മുതല്‍ സ്വകാര്യ ബസും കെ.എസ്.ആര്‍.ടി.സിയും മത്സരയോട്ടത്തിലായിരുന്നു. എന്നാല്‍ ഓണപ്പുട ജങ്ഷനിലെത്തിയ സ്വകാര്യ ബസ് വളാഞ്ചേരി ഭാഗത്തു നിന്നും വന്ന മറ്റൊരു ബസിന് വഴിമാറിയ ശേഷം ബ്രേക്കിട്ടു. ഇതോടെ കെ.എസ്.ആര്‍.ടി.സി ബസ് ഇടതു വശത്തിലൂടെ കയറാന്‍ ശ്രമിക്കുന്നതിനിടെ സമീപത്തു നിര്‍ത്തിയിട്ട കാറിലും സ്‌കൂട്ടറിലും ഇടിച്ചു. ശേഷം ടൗണ്‍ മസ്ജിദിന്റെ ഒരടിയോളം ഉയര്‍ച്ചയുള്ള സ്ലാബിലൂടെ കയറി മസ്ജിദിന്റെ സണ്‍ഷൈഡ് തകര്‍ത്തു. ടയര്‍ പൊട്ടിയ ശേഷമാണ് കെ.എസ്.ആര്‍.ടി.സി ബസ് നിന്നത്. ഇടിയുടെ ആഘാദത്തില്‍ കെ.എസ്.ആര്‍.ടി.സി ബസിന്റെ മുന്‍വശം തകര്‍ന്നിട്ടുണ്ട്. ആര്‍ക്കും കാര്യമായ പരുക്കുകുകളില്ല. ഈ റൂട്ടില്‍ മത്സരയോട്ടം പതിവാണെന്നും നാട്ടുകാര്‍ പറയുന്നു.