കോവളം: വിഴിഞ്ഞം, വാഴമട്ടം, പാച്ചല്ലൂര്‍, കോവളം എന്നിവിടങ്ങളിലുണ്ടായ വിവിധ വാഹനാപകടങ്ങളില്‍ ദമ്പതികളും സ്‌കൂള്‍ വിദ്യാര്‍ഥികളുമടക്കം ആറുപേര്‍ക്ക് പരുക്കേറ്റു.
ഇന്നലെ പുലര്‍ച്ചെ ഒന്നിന് കോവളം ജങ്ഷന് സമീപം സ്‌കൂട്ടറില്‍ യാത്രചെയ്യുകയായിരുന്ന ബാലരാമപുരത്ത് താമസിക്കുന്ന യുവാവിനെ കാര്‍ ഇടിച്ച് തെറിപ്പിക്കുകയായിരുന്നു. കാര്‍ നിറുത്താതെ പോയതായി കോവളം പൊലിസ് അറിയിച്ചു. സാരമായി പരുക്കേറ്റ യുവാവിനെ മെഡിക്കല്‍ കോളജാശുപത്രിയില്‍ പ്രവേശിപ്പിച്ചു.
രാവിലെ 9.30ന് വിഴിഞ്ഞം ജങ്ഷനില്‍ കെ.എസ്.ആര്‍.ടി.സി ബസ് ബൈക്കിലിടിച്ചുണ്ടായ അപകടത്തില്‍ ബൈക്ക് യാത്രികരായ മുട്ടയ്ക്കാട് സ്വദേശികളും വിദ്യാര്‍ഥികളുമായ ബിഹുല്‍ (18), രാജേഷ് (20)എന്നിവര്‍ക്കാണ് പരുക്കേറ്റത്. സാരമായി പരുക്കേറ്റ ഇരുവരെയും ആദ്യം വിഴിഞ്ഞം ആശുപത്രിയിലും പിന്നെ മെഡിക്കല്‍ കോളജാശുപത്രിയിലും പ്രവേശിപ്പിച്ചു.
ഇന്നലെ വൈകിട്ട് പാച്ചല്ലൂരില്‍ തെരുവുനായ കുറുകെ ചാടിയതിനെ തുടര്‍ന്ന് സ്‌കൂട്ടര്‍ നിയന്ത്രണം വിട്ട് മറിഞ്ഞുണ്ടായ അപകടത്തിലാണ് മദനന്‍, ഭാര്യ ശോഭ എന്നിവര്‍ക്ക് പരുക്കേറ്റത്.
ഇവരെ സ്വകാര്യ ആശുപത്രിയിലും വൈകിട്ട് 7ന്് വാഴമുട്ടത്ത് നിറുത്തിയിട്ടിരുന്ന കാറിന് പുറകില്‍ ബൈക്ക് ഇടിച്ചുണ്ടായ അപകടത്തില്‍ പരുക്കേറ്റ പൂവാര്‍ സ്വദേശിയായ പ്രസാദിനെ മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു.