ബാലുശ്ശേരി: നാട്ടിന്‍പുറങ്ങളില്‍ ജനങ്ങള്‍ കുടിവെള്ളത്തിനായി നെട്ടോട്ടമോടുമ്പോള്‍ മദ്യപന്‍മാര്‍ക്കു ഒഴിഞ്ഞ കുപ്പികള്‍ തള്ളുന്നതിന് പഞ്ചായത്ത് വക കിണര്‍.
രൂക്ഷമായ കുടിവെള്ളക്ഷാമം പരിഹരിക്കുന്നതിനു വര്‍ഷങ്ങള്‍ക്കു മുന്‍പ് നന്മണ്ട ഹൈസ്‌കൂളിനു മുന്‍വശത്തായി ഗ്രാമപഞ്ചായത്ത് ലക്ഷങ്ങള്‍ മുടക്കി നിര്‍മിച്ച കിണറ്റിലാണ് മാലിന്യങ്ങള്‍ നിക്ഷേപിക്കുന്നത്. ഏറെക്കാലം ഇതിലെ വെള്ളം കുടിവെള്ളമായി ഉപയോഗിച്ചിരുന്നു. പിന്നീട് സാമൂഹ്യദ്രോഹികള്‍ ഇരുട്ടിന്റെ മറവില്‍ മാലിന്യങ്ങള്‍ തള്ളിയതോടെ കിണര്‍ ഉപയോഗ ശൂന്യമാവുകയായിരുന്നു.
ഇതോടെ കിണര്‍ കൊതുകു വളര്‍ത്തുകേന്ദ്രമായി മാറുകയും ചെയ്തു. ഏറ്റവും കൂടുതല്‍ കുടിവെള്ള ക്ഷാമം നേരിടുന്ന പ്രദേശമാണ് നന്മണ്ട. കിണര്‍ വൃത്തിയാക്കി കുടിവെള്ള സ്രോതസായി ഉപയോഗിക്കണമെന്ന് പഞ്ചായത്ത് അധികൃതരോട് ആവശ്യപ്പെട്ടിട്ടും നടപടിയെടുത്തില്ലെന്ന് നാട്ടുകാര്‍ പറഞ്ഞു.