പയ്യന്നൂര്‍: വൈകല്യത്തെ തോല്‍പ്പിച്ച് അഞ്ജു വിരിയിച്ചത് അതിജീവനത്തിന്റെ പൂക്കള്‍. ജില്ലാ ശാസ്‌തോത്സവത്തിലെ പേപ്പര്‍ ക്രാഫ്റ്റ് മത്സരയിനത്തില്‍ പങ്കെടുത്ത കുഞ്ഞിമംഗലം ഹയര്‍ സെക്കന്‍ഡറി സ്‌കൂളിലെ പ്ലസ് ടു വിദ്യാര്‍ഥിനി അഞ്ജു ശ്രീധരനാണു വീല്‍ചെയറിലിരുന്ന് മത്സരത്തില്‍ പങ്കെടുത്തത്. ജന്മനാ കാലിനു ചലനശേഷി നഷ്ടപ്പെട്ട അഞ്ജു തന്റെ കരവിരുതിനാല്‍ വളരെവേഗം തന്നെ കടലാസ് പൂക്കള്‍ നിര്‍മിച്ചെടുത്തത്. സമ്മാനം ലഭിച്ചില്ലെങ്കിലും തന്റെ കന്നി അങ്കത്തില്‍ നല്ല മത്സരം കാഴ്ചവയ്ക്കാന്‍ അഞ്ജുവിനു കഴിഞ്ഞു. ഇന്റര്‍നെറ്റിലൂടെ പഠിച്ചാണു പേപ്പര്‍ ക്രാഫ്റ്റിങ്ങ് വിദ്യ അഞ്ജു സ്വായത്തമാക്കിയത്. കെ.എസ്.ആര്‍.ടി.സി ഡ്രൈവര്‍ വിളയാംകോട്ടെ ശ്രീധരന്റെയും രത്‌നവല്ലിയുടെയും മകളാണ് അഞ്ജു.