കോഴിക്കോട്: 1000, 500 രൂപയുടെ കറന്‍സി നോട്ടുകള്‍ പിന്‍വലിച്ചതിനു പിന്നാലെ തുടങ്ങിയ പ്രതിസന്ധി രൂക്ഷമാവുന്നു. നോട്ട് മാറാന്‍ നെട്ടോട്ടമോടുന്ന ജനങ്ങള്‍ക്ക് ആവശ്യത്തിന് കൊടുക്കാന്‍ നോട്ടില്ലാതെ ബാങ്കുകളും നെട്ടോട്ടമോടുന്നു. ഇന്നത്തെ പ്രധാന സംഭവങ്ങള്‍...

1. പുലര്‍ച്ചെ അഞ്ചു മണി മുതല്‍ തന്നെ ബാങ്കുകളില്‍ നീണ്ട ക്യൂ തുടങ്ങി. പലരും വരുന്ന് ആശുപത്രികളടക്കമുള്ള അത്യാവശ്യ കാര്യത്തിനായി. പല ബാങ്കുകള്‍ക്കു മുന്നിലെ ക്യൂവും റോഡുകളിലേക്ക് നീണ്ടതോടെ രാവിലെ തന്നെ ഗതാഗത സ്തംഭനം.                                                                                       
2. നിലവില്‍ പുതുതായി ഇറക്കിയ 2000 നോട്ടുകള്‍ മാത്രമാണ് ബാങ്കുകളില്‍ വിതരണം ചെയ്യുന്നത്. അഞ്ഞൂറിന്റെ നോട്ട് ഇതുവരെ ബാങ്കുകളില്‍ എത്തിയില്ല. റിസര്‍വ്വ് ബാങ്കിന്റെ കൊച്ചി ശാഖയില്‍ ഇതുവരെ 500 ന്റെ നോട്ട് എത്തിയിട്ടില്ലെന്നാണ് വിവരം. ഇത് എന്ന് എത്തുമെന്നതിലും വിശദീകരണമില്ല.                                                                                                                                                                                 
3. ആദ്യം വിതരണം ചെയ്തിരുന്ന 100 രൂപയുടെ നോട്ടുകള്‍ ഇന്നലെത്തന്നെ കഴിഞ്ഞു. ബാക്കിയുള്ളത് 10, 20, 50 ന്റെ നോട്ടുകള്‍ മാത്രം. ക്ലീന്‍ നോട്ട് പദ്ധതി പ്രകാരം ഒഴിവാക്കിയിരുന്ന മുഷിഞ്ഞ നോട്ടുകളും ഉപയോഗിച്ചാണ് ബാങ്കുകള്‍ വിതരണം ചെയ്യുന്നത്. പല ബാങ്കുകളിലും ഇന്നലെ വിതരണം ചെയ്തത് പത്തിന്റെയും ഇരുപതിന്റെയും നോട്ട് കെട്ടുകള്‍. ഇതും ഇന്ന് ഉച്ചയോടെ തീരുമെന്നാണ് ഉദ്യോഗസ്ഥര്‍ പറയുന്നത്.                                                                                                                                                                               
4. എ.ടി.എമ്മുകള്‍ ഇന്നലെ പ്രവര്‍ത്തനം ആരംഭിച്ചിരുന്നുവെങ്കിലും ഉച്ചയോടെ തന്നെ പണം കാലിയായി. ഇന്നും പുലര്‍ച്ചെ മുതല്‍ നീണ്ട ക്യൂ രൂപപ്പെട്ടു. എ.ടി.എം പ്രതിസന്ധിയും പരിഹരിക്കാന്‍ മറ്റു നടപടികളൊന്നുമില്ല.                                                                                                                                                            
5. ഫലത്തില്‍ ദിനം കൂടുന്തോറും പ്രശ്‌നം സങ്കീര്‍ണമായിക്കൊണ്ടിരിക്കുന്നു. അഞ്ഞൂറിന്റെ നോട്ട് ഇന്ന് എത്തിയില്ലെങ്കില്‍ പ്രശ്‌നം രൂക്ഷമാവും. രണ്ടായിരത്തിന്റെ നോട്ട് കിട്ടിയെങ്കിലും ഉപയോഗിക്കാന്‍ പറ്റാത്ത സാഹചര്യമുണ്ടാവും. എ.ടി.എമ്മിനെ പ്രതീക്ഷിച്ച് നിക്ഷേപം നടത്തിയവര്‍ക്കും ദുരിതം തന്നെ.       
6. പല ബാങ്കുകളിലും ആളുകളെ നിയന്ത്രിക്കാന്‍ പൊലിസിനെ നിയോഗിച്ചു. ഷട്ടറുകള്‍ പകുതി അടച്ചും മറ്റുമാണ് ഇന്നലെ ജനങ്ങളെ നിയന്ത്രിച്ചത്.

[caption id="attachment_164544" align="aligncenter" width="600"] എസ്.ബി.ഐ കായംകുളം ശാഖയില്‍ ആളുകളെ നിയന്ത്രിക്കാന്‍ പൊലിസെത്തിയപ്പോള്‍[/caption]