ആലപ്പുഴ: സംസ്ഥാന സ്‌പെഷല്‍ സ്‌കൂള്‍ കലോത്സവത്തില്‍ ഉപകരണസംഗീത വിഭാഗത്തില്‍ കീബോര്‍ഡ് വായനയില്‍ ഫാത്തിമ അന്‍ഷിയുടെ പ്രകടനം ഗംഭീരമായി . ഫസ്റ്റ് എഗ്രേഡോടെ ഉപകരണസംഗീതത്തിലും ശാസ്ത്രീയ സംഗീതത്തിലും അന്‍ഷി ഒന്നാമതെത്തി.
മലപ്പുറം പള്ളിക്കാപറ്റ കേരള സ്‌കൂള്‍ ഫോര്‍ ദി ബ്ലെയ്ഡിലെ ആറാം ക്ലാസ് വിദ്യാര്‍ഥിയാണ്. മലപ്പുറം മേലാറ്റൂര്‍ എടപ്പറ്റ് തൊടുപുഴി കുന്നുമ്മേല്‍ വീട്ടില്‍ അബ്ദുല്‍ബാരി- ബേബി ഷംല ദമ്പതികളുടെ മകളാണ്. ഇതിനു പുറമെ സംഘഗാന മല്‍സരത്തില്‍ അന്‍ഷി നയിച്ച ടീമിനാണ് ഫസ്റ്റ് ഗ്രേഡ് ലഭിച്ചത്. ദേശഭക്തി ഗാനത്തില്‍ സെക്കന്റ് എഗ്രേഡും കഥാപ്രസംഗത്തില്‍ തേര്‍ഡ് എഗ്രേഡും സ്വന്തമാക്കി.
മൂന്നുവര്‍ഷമായി സംസ്ഥാന കലോല്‍സവത്തില്‍ വിവിധ വിഭാഗങ്ങളില്‍ സമ്മാനം നേടിവരുന്നു. കഴിഞ്ഞ സംസ്ഥാന സ്‌കൂള്‍ കലോല്‍സവത്തില്‍ ഉപകരണസംഗീതത്തിലും ശാസ്ത്രീയ സംഗീതത്തിലും ഫസ്റ്റ് എ ഗ്രേഡ് ലഭിച്ചു.ദര്‍ശന ടിവിയിലെ കുട്ടിക്കുപ്പായം റിയാലിറ്റി ഷോയില്‍ സെമിഫൈനല്‍ മല്‍സരാര്‍ഥിയാണ്.
കൈരളിടിവിയുടെ പട്ടുറുമാല്‍ റിയാലിറ്റി ഷോയില്‍ അന്‍ഷിക്ക് അവസരം ലഭിച്ചു. ബാംഗ്ലൂര്‍ ആസ്ഥാനമായി പ്രവര്‍ത്തിക്കുന്ന പ്രൊജക്ട് വിഷന്‍ സംഘടനയുടെ കേരളത്തിലെ അംബാസിഡറാണ്.